महिला विश्वकपमा कोलम्बियाले हरायो जर्मनीलाई

१४ साउन, काठमाडौं । मानुएला भानेगासले ९७ औं मिनेटमा निर्णायक गोल गरेपछि कोलम्बियाले २०२३ फिफा महिला विश्वकपमा जर्मनीलाई पराजित गरेको छ ।

दक्षिण अमेरिकी टोलीलाई अग्रता दिलाउन ५२औं मिनेटमा लिन्डा क्यासेडोले उत्कृष्ट गोल गरे पनि ८९औं मिनेटमा अलेक्जान्ड्रा पपको पेनाल्टीमा जर्मनीले बराबरी गरेको थियो ।

९७औं मिनेटमा कर्नरमा आएको बललाई हेडमार्फत जाली चुमाउँदै भेनेगासले सिड्नी फुटबल स्टेडियम उपस्थिति कोलम्बियाका समर्थकलाई खुसी दिइन् ।

यो सन् १९९५ पछि विश्वकपको समूह चरणमा जर्मनीको पहिलो हार हो ।

यो समूहको अन्तिम चरणका खेल ३ अगस्टमा हुनेछन्, कोलम्बियाले मोरक्को र जर्मनीले दक्षिण कोरियाको सामना गर्नेछ ।

समूहको शीर्ष स्थानमा रहेको कोलम्बियाको ६ अंक छ । नक आउट नजिक पुगेको कोलम्बियालाई समूह विजेता हुन एक अंक चाहिन्छ । मोरक्को र जर्मनीको समान ३ अंक छ भने कोरियाको कुनै अंक छैन ।