फुटबलबाट हजार्डको सन्यास

२३ असोज, काठमाडौं । इडेन हजार्डले ३२ वर्षको उमेरमै फुटबलबाट सन्यास लिएका छन् ।

बेल्जियमका विंगर हर्जाडले एक वर्ष सम्झौता बाँकी रहँदै गत सिजनको अन्त्यमा रियल मड्रिड छाडेका थिए । त्यसपछि उनी कुनै क्लबमा पनि गएनन् ।

२०१२ मा चेल्सीमा अनुबन्ध भएका उनले ३५२ खेल खेल्दै ११० गोल गरे भने दुई पटक प्रिमियर लिग जिते । २०१९ मा रियल मड्रिड गएपछि उनको अवस्था फेरियो । पहिलो सिजनमै च्याम्पियन्स लिगमा पेरिस सेन्ट जर्मेन (पीएसजी) सँगको खेलका क्रममा चोट बोकेपछि उनी पुरानो लयमा फर्किन सकेनन् ।

उनले रियलका लागि जम्मा ५४ लिग खेल खेलेका छन् । गत सिजन त उनले जम्मा ६ खेलमा अवसर पाए ।

हर्जाडले गत डिसेम्बरमा मात्र अन्तर्राष्ट्रिय फुटबलबाट सन्यास लिएका थिए । मंगलबार सामाजिक सञ्जालमार्फत खेलाडी जीवनबाटै सन्यास लिएको घोषणा गरेका छन् ।

‘आफूले आफैंलाई सुन्नु पर्छ, र समय समयमा रोकिनुपर्छ’ उनले भनेका छन्, ‘१६ वर्ष, अनि ७०० भन्दा बढी खेल खेलेपछि मैले आफ्नो व्यावसायिक फुटबल करिअरलाई अन्त्य गर्ने निर्णय गरेको छु ।’