‘छक्का पन्जा ४’ र ‘झिङ्गेदाउ’ भिडियो पसलमा रिलिज

काठमाडौं । व्यवसायिकरुपमा हिट फिल्म ‘छक्कापञ्जा ४’ र ‘झिंगेदाउ’ ओटीटी प्लेटफर्म भिडियो पसलमा रिलिज भएका छन् । दशैं छेकोमा यी दुई फिल्मलाई सार्वजनिक गरिएको हो ।

अहिलेलाई भने विदेशस्थित दर्शकले मात्र हेर्न पाउने सुविधा छ । विदेशस्थित दर्शकबाट यी दुई फिल्मलाई लिएर उच्च माग रहेकाले रिलिज गरेको भिडियो पसलका संचालक निश्चल पाण्डेले बताए ।

स्मार्टफोन प्रयोगकर्ताले एप डाउनलोड गरेर फिल्म हेर्न सक्नेछन् । भिडियो पसलमा २.९९ डलरदेखि ५.९९ डलरसम्म विभिन्न प्याकेज लिएर फोरके गुणस्तरमा फिल्म हेर्न सक्ने भएका छन् । उपलब्ध फिल्म विदेशबाट एप्पल पे, गुगल पे, पेपल, डेबिट–क्रेडिट कार्डबाट शुल्क तिरेर हेर्ने व्यवस्था गरिएको छ ।

हलमा व्यवसायिक सफलता पाइसकेको फिल्म ओटीटीमा आउने भएपछि निर्माता तथा अभिनेता दीपकराज गिरीले खुशि व्यक्त गरे । हरेक दिन सो फिल्मको डिजिटल रिलिजबारे प्रश्न आउने हुँदा अब भने दर्शकले घरमा नै परिवारसँग बसेर मजा लिन सक्ने दीपक बताउँछन् ।

हेमराज विसीले निर्देशन गरेको फिल्म ‘छक्कापन्जा ४’मा दीपकसहित दीपाश्री निरौला, केदार घिमिरे, निर्मल शर्मा, बुद्धि तामाङ, स्वस्तिमा खड्का, राज आचार्य, सुष्मा निरौला, वेदना राईको अभिनय छ ।

पारिवारिक कथावस्तुमा निर्माण भएको ’झिङ्गेदाउ’ मा भने अभिनेत्री केकी अधिकारी, आँचल शर्मा, अभिनेता कुशल विष्ट, मुकुन भुसालको मुख्य भूमिका रहेको छ । चलचित्रलाई निर्देशक ज्ञानेन्द्र देउजाले निर्देशन गरेका हुन् ।

२०१७ देखी सञ्चालनमा रहेको ’भिडियोपसल’मा यस अघि नै कबड्डी ३, जात्रै जात्रा, प्रसाद, साइँली लगायतका चलचित्रहरू रिलिज भई सकेका छन् । एपमा चलचित्र सँगै अन्य सर्ट फिल्महरू पनि उपलब्ध छन् ।