सन सेक्युरिटिजको लाइफटाइम निःशुल्क रेमिट डिम्याट खाता सञ्चालन

काठमाडौं । सन सेक्युरिटिज प्रालिले अन्तर्राष्ट्रिय श्रमिक दिवसको अवसरमा विश्वभर छरिएर रहेका नेपाली श्रमिकका लागि रेमिट डिम्याट खाता सञ्चालनमा ल्याएको छ ।

रेमिट डिम्याट खाताको माध्यमबाट विदेशमा बस्ने नेपालीलाई नेपालको पूँजी बजारमा लगानीका लागि आवश्यक रहने डिम्याट खाता, मेरो सेयर तथा ब्रोकर खाता निःशुल्क खोल्ने तथा आजीवन निःशुल्क सञ्चालन गरी कारोबार गर्ने कार्यका लागि सहजीकरण गर्ने कम्पनीको विश्वास छ ।

यस सेवाको माध्यमबाट विदेशमा रहेका नेपालीले नेपालको पूँजी बजारमा लगानी गर्न सहयोग पुग्ने विश्वाससहित यो सेवाको सुरुवात गरिएको सन सेक्युरिटिजले जनाएको छ ।

‘मिसन ०८४, एक नेपाली एक ब्रोकर खाता’ अभियानलाई सार्थकता दिने क्रममा विदेशमा रहेका नेपालीका लागि सञ्चालन गरिएको रेमिट डिम्याट खाता विदेशमा रहेका श्रमिक, विद्यार्थी तथा अन्य पेसामा आबद्ध नेपालीले समेत खोल्न सक्ने कम्पनीको भनाइ छ ।

कम्पनीको वेबसाइट www.sunsecurities.com बाट ओपन एकाउन्टमा गएर वा सिधा https://www.sunsecurities.com/portal.html बाट रेमिट डिम्याट खाता छनोट गरी आवश्यक कागजात संलग्न गरी खाता खोल्न सकिन्छ ।

यसैगरी सन सेक्युरिटिजका कर्मचारीसमक्ष भिडियोमा उपस्थित भई भिडियो केवाईसी भेरिफाइ गर्न सक्ने वा स्वयंले भिडियो केवाईसीमा दिइएको निर्देशन पालना गरी भिडियो केवाईसी भेरिफाइ गरेर पनि खाता खोल्न सकिने छ ।

निकट भविष्यमै यस प्रोडक्टमा आबद्ध ग्राहकका लागि बैंक वित्तीय संस्थासँगको सहकार्यमा बैंक खाता, सिआस्बा रजिस्ट्रेसन तथा कनेक्ट आईपीएस समेत प्रदान गर्ने उद्देश्यले तयारी गरिरहेको कम्पनीले जनाएको छ । जसबाट ग्राहकले एकद्वार प्रणालीबाटै पूँजी बजारमा सहभागिताका लागि आवश्यक सबै सेवा प्रदान गर्ने लक्ष्य कम्पनीले राखेको छ ।

यस रेमिट डिम्याट खाताको माध्यमबाट विदेशमा रहेर नेपालको पूँजी बजारमा उचित ढंगबाट लगानी गर्न सके विदेशमा आर्जन गरेको रकमबाट हुने बचतबाट भविष्यमा आर्थिक रूपले आत्मानिर्भर र आर्थिक समृद्धिमा सहयोग पुग्ने विश्वास कम्पनीको छ ।