३१ वैशाख, काठमाडौं । ललितपुर महानगरपालिकामा कवाडी कर उठाउन जबर्जस्ती गर्दा पक्राउ परेका ठेकेदारसहित चार जनालाई ७ दिन म्याद थपेर प्रहरीले मुद्दा चलाउने भएको छ ।
कवाडी कर उठाउन जिम्मा पाएको ठेकेदार कम्पनीका सञ्चालकसहित उनीहरूलाई प्रहरीले सोमबार बिहान नियन्त्रणमा लिएको थियो ।
सेवाग्राहीमाथि हातपात गरेको आरोपमा इन्द्रेणी हार्डवेयर एन्ड सेनेटरी वेयर प्रालिका सञ्चालक रोशन चौधरीसहित ठेकेदार कम्पनीका कर्मचारीहरू गुमानविक्रम खत्री, प्रकाश बस्नेत र श्याम ठकुरीलाई प्रहरीले नियन्त्रणमा लिएको थियो ।
कवाडी कर विषयमा विवाद हुँदा ठेकेदार कम्पनीका सञ्चालक चौधरीसहितका कर्मचारीले आफूहरूमाथि हातपात गरेको आरोप चुनढुंगा सप्लायर्सका कर्मचारीको छ ।
उनीहरूलाई ७ दिनका लागि जिल्ला अदालत ललितपुरबाट म्याद थपेर अभद्र व्यवहारको मुद्दा चलाउने तयारी गरेको ललितपुर प्रहरी प्रमुख वरिष्ठ प्रहरी उपरीक्षक (एसएसपी) शेखर खनालले बताए ।
विवाद के थियो ?
गोदावरी नगरपालिकामा कर तिरेसकेकाले फेरि ललितपुर महानगरपालिकामा किन कर तिर्ने भन्दै सप्लार्यका कर्मचारीले ठेकेदार कम्पनीका कर्मचारीसँग प्रश्न गरेका थिए ।
सोही विषयमा विवाद हुँदा आफूहरूमाथि ठेकेदार कम्पनीका सञ्चालक सहित कर्मचारीले हातपात गरेको उनीहरूको आरोप छ ।
ललितपुर प्रहरी प्रवक्ता प्रहरी उपरीक्षक नरेशराज सुवेदीका अनुसार गोदावरी नगरपालिकामा कर तिरेर आइसकेको हुँदा ललितपुर महानगरमा फेरि किन तिर्ने भनेपछि सप्लायर्स र ठेकेदार कम्पनीका कर्मचारीबीच विवाद भएको भन्ने बुझिएको थियो । थप अनुसन्धान गरेर प्रहरीले अभद्र व्यवहारमा मुद्दा दर्ता गर्न लागेको हो ।
ललितपुर महानगरसँग गत महिनादेखि इन्द्रेणी हार्डवेयर एन्ड सेनेटेरी वेयर प्रालिले १० करोड १८ लाखमा कवाडी कर उठाउने ठेक्का लिएको थियो ।
सम्झौतासँगै ठेकेदार कम्पनीले ललितपुर छिर्ने विभिन्न स्थानका नाकामा ढाट राखेर पैसा उठाइरहेको छ । महानगरले १८ वटा विभिन्न कवाडीजन्य सामान, जडीबुटी, हाडखोर लगायत वस्तुमा कर उठाउन ठेक्का दिएको हो ।
कवाडी कर संकलन क्रममा ठेकेदार कम्पनीले गुन्डागर्दी शैली अपनाएको भन्दै सरोकारवालाले चर्को विरोध जनाउँदै आएका छन् ।
यो खबर पढेर तपाईलाई कस्तो महसुस भयो ?
खुसी
दुःखी
अचम्मित
उत्साहित
आक्रोशित
प्रतिक्रिया
Hot Properties
प्रतिक्रिया 4