आलमलाई सफाइ दिने न्यायाधीश र कानुनमन्त्रीको कल डिटेल छानबिन होस् : कानुन व्यवसायी

२१ जेठ, काठमाडौं । नेपाल कम्युनिष्ट पार्टी(एकीकृत समाजवादी) समर्थित कानून व्यवसायीहरुले कांग्रेसका पूर्वसांसद मोहम्मद आफ्ताब आलमलाई सफाइ दिने न्यायाधीश एवं कानुनमन्त्रीको कल डिटेल रेकर्ड (सीटीआर) हेरेर अनुसन्धान अघि बढाउन माग गरेका छन् ।

समाजवादी पेशागत कानुन व्यवसायी संगठनको पर्सा जिल्ला समितिले मंगलबार एक विज्ञप्ति जारी गरी फैसलाको दुई दिनअघि र दुई दिनपछिको कल डिटेल रेकर्डमाथि छानबिन गर्न माग गरेका हुन् ।

बम विस्फोट गरी व्यक्ति हत्याको आरोप खेपेका कांग्रेसका पूर्वसांसद मोहम्मद आफताब आलमले आरोपबाट सफाइ पाएका छन् । जिल्ला अदालत रौतहटले उनलाई दोषी ठहर गर्दै जन्मकैदको फैसला गरेकोमा उच्च अदालतको वीरगञ्ज इजलासले सफाइ दिएको हो ।

‘फैसलालाई लिई यत्रतत्र सर्वत्र चौतर्फी विरोध भइरहकाले न्यायपालिकाको मान मर्यादा अक्षुण्णता, विश्वास कायम राख्नका लागि न्यायपरिषदमा उजुरी समेत परिसकेको’ संगठनको पर्सा जिल्ला सचिव हरिशंकरप्रसाद चौहानले जारी गरेको विज्ञप्तिमा भनिएको छ, ‘उक्त मुद्दामा आवद्ध न्यायाधीशहरू, कानुन व्यवसायी तथा कानुनमन्त्री समेतको मोवाइल कल डिटेलको माग गरी निष्पक्ष तथा पारदर्शी रुपमा छानबिन गरियोस् ।’

उच्च अदालत बार एसोसिएसन वीरगञ्जले एकल रूपमा फैसलाको आलोचना रोक्न विज्ञप्ति जारी गरेको भन्दै संगठनले फैसलामाथि प्रश्न उठ्नुलाई न्यायालयको अपमान ठान्न नहुने भनेको छ । विज्ञप्तिमा भनिएको छ, ‘फैसलामा प्रश्नहरू उठ्नु आफैंमा न्यायिक प्रणालीलाई बलियो बनाउने प्रक्रिया हुन्, कमजोर बनाउने होइन ।’

यो पनि पढ्नुहोस

उच्च अदालतले नदेखेको ‘रौतहट नरसंहार’

यो पनि पढ्नुहोस

सिंगो गाउँले देखेको रौतहट विस्फोट न्यायाधीशले देखेनन्

यो पनि पढ्नुहोस

आलम छुटेसँगै त्रसित परिवार भन्छ- अब सर्वोच्च जान्छौं, सास रहेसम्म लड्छौं