झलनाथले बोल्छु भन्दाभन्दै काटियो माइक, सकियो बैठक

१४ कात्तिक, काठमाडौ । नेकपा एकीकृत समाजवादीको केन्द्रीय कमिटी बैठक सौहार्दपूर्ण समापन हुन सकेन ।

वरिष्ठ नेता वेदुराम भुसालले राखेको पार्टी एकताको प्रस्तावमा साझा मत बन्न नसक्दा पूर्वप्रधानमन्त्री झलनाथ खनाल बोल्दाबोल्दै बैठक समापन भयो । तीन दिनसम्म चलेको बैठकमा खनाल सहित महासचिव घनश्याम भूसाल पक्षधर नेताहरुले नेतृत्व पुनर्गठन नगरी एकतामा जान नहुने अडान लिएका थिए ।

तर अध्यक्ष माधवकुमार नेपालले माअ‍ेवादी सहितका शक्तिहरुसँग हुने एकता प्रक्रिया नरोकिने निर्णय लिए । ‘यो सुटुक्क र व्यक्तिगत रुपमा एकता गरेको पनि होइन । सचिवालय, स्थायी कमिटीको निर्णय अनुसार वार्ता टोली बनाएर बकाइदा एकता प्रक्रिया प्रक्रिया बढाइएको हो,’ बैठक समापन गर्दै नेपालले भने ।

बाचुञ्जेल नेतृत्वमा बस्ने रहर पनि आफूसँग नरहेको अध्यक्ष नेपालले तर्क गरेका थिए । ‘मैले प्रचण्डलाई ३६/४० वर्ष भयो नेतृत्व छोड्नुस् भनेको छु । म पनि संसार घुम्न मन छ, नेतृत्वमा बस्दिनँ,’ उनले भने । यति भनेपछि अध्यक्ष नेपालले सचिवालय बैठकबाट एकताबारे निर्णय हुने जानकारी पनि दिए ।

‘धेरै जोडकोण मिलाउन बाँकी छ । सचिवालयमा बसेर हामी त्यो निर्णय लिन्छौ,’ माधव नेपालले यति आफ्नो प्रतिवेदन पारित गराउने अनुमति मागेका थिए । तर पूर्वप्रधानमन्त्री खनालले असहमतिमा बोले ।

‘हाहा, हुहुले हुँदैन । मैले ३० पन्नाको दस्तावेज रोखेको छु,’ खनालले भन्दै थिए । तर यतिमै माइक काटियो र बैठक सकियो । ‘माइक काटिएपछि बैठक सकिएको जानकारी भयो, हामी हिड्यौ,’ एक नेताले भने ।