९० वर्षको उमेरमा दलाई लामाले जिते ग्रामी अवार्ड

लस एन्जलस । सन् २०२६ को ग्रामी अवार्डमा एउटा निकै विशेष पल देखियो । तिब्बती धर्मगुरु दलाई लामाले पनि यस वर्ष विश्व संगीतको सर्वोच्च अवार्ड ग्रामी जितेका छन् ।

समारोहको ‘प्रिमियर शो’ (मुख्य कार्यक्रमभन्दा अगाडिको खण्ड) मा लामालाई ‘बेस्ट अडियो बुक, न्यारेसन एन्ड स्टोरीटेलिङ रेकर्डिङ’ विधामा विजेता घोषित गरियो ।

लामा कार्यक्रममा उपस्थित हुन नसकेपछि उनको तर्फबाट अमेरिकी गायक तथा संगीतकार रुफस वेनराइटले स्टेजमा गएर उक्त ग्रामी ट्रफी ग्रहण गरेका थिए ।

हिमाचल प्रदेशस्थित धर्मशालाको म्याकलोड गञ्जमा बस्दै आएका लामाले आफ्नो विशेष कृति ‘मेडिटिएसन्स : द रिफ्लेक्सन अफ हिज होलिनेस दलाइ लामा’ का लागि यो प्रतिष्ठित ग्रामी अवार्ड जितेका हुन् ।

यो विधामा निकै कडा प्रतिस्पर्धा थियो । उनीसँगै यस विधामा अन्य चर्चित व्यक्तित्व पनि मनोनयनमा परेका थिए । जसमा, मिली भानीलीका फाब मोर्भान (गायक), केतान्जी ब्राउन ज्याक्सन (अमेरिकी सर्वोच्च अदालतकी न्यायाधीश), ट्रेभर नोआ (कमेडियन र ग्रामीका होस्ट) र क्याथी गार्भर (अभिनेत्री) ।

ग्रामी जितेपछि लामाले सामाजिक सञ्जालमार्फत प्रतिक्रिया दिएका छन् । उनले भनेका छन्, ‘म यो सम्मानलाई कृतज्ञता र नम्रताका साथ स्वीकार गर्दछु । म यसलाई व्यक्तिगत सफलताको रूपमा भन्दा पनि हाम्रो साझा विश्वव्यापी जिम्मेवारीको पहिचानको रूपमा हेर्छु । म साँचो मनले विश्वास गर्छु कि शान्ति, करुणा, वातावरणको हेरचाह र सम्पूर्ण मानवता एक हो भन्ने बुझाइ नै विश्वका आठ अर्ब मानिसको सामूहिक कल्याणका लागि आवश्यक छ । यो ग्रामी सम्मानले यी सन्देशलाई अझ व्यापक रूपमा फैलाउन मद्दत पुग्नेछ भन्ने कुरामा म आभारी छु ।’

यो अडियो बुकका निर्माता एटलान्टामा बस्ने भारतीय मूलका कबिर सेगल हुन् । सेगल बहुमुखी प्रतिभाका धनी व्यक्तित्व हुन् । उनी बेस-गिटारिस्ट, संगीतकार, फिल्म निर्माताका साथै एक सैनिक भेट्रान र फाइनान्स विज्ञ पनि हुन् । उनी आफैँले यसअघि धेरै पटक ग्रामी र एमी अवार्ड जितिसकेका छन् ।

यो एल्बम तयार पार्न लामाका १०० घण्टाभन्दा बढी लामा भाषण र कुराकानीलाई समेटिएको छ । यसलाई अझ विशेष बनाउन विश्वप्रसिद्ध कलाकारले आफ्नो कला मिसाएका छन् । यस एल्बममा उस्ताद अमजद अली खान (सरोद वादनका विश्वप्रसिद्ध हस्ती), अमान र अयान अली बंगश (उस्ताद अमजद अली खानका छोराहरू, जो स्वयं कुशल सरोद कलाकार हुन्), रुफस वेनराइट (चर्चित अमेरिकी गायक) र आन्द्रा डे (प्रख्यात अमेरिकी गायिका तथा अभिनेत्री) जस्ता दिग्गज कलाकार सहभागी छन् ।

दलाई लामाले ९० वर्षको उमेरमा ग्रामी जितेका हुन् ।