रसुवा बाढीमा कोशीका १३८ जना सम्पर्कविहीन

News Summary

Generated by OK AI. Editorially reviewed.

रसुवाको भोटेकोशी हुँदै आएको बाढीपछि कोशी प्रदेशबाट १ सय ३८ जना सम्पर्कविहीन भएको आफन्तले प्रहरीलाई जानकारी गराएका छन्।
प्रदेश प्रहरी कार्यालय विराटनगरका अनुसार सम्पर्कविहीनमध्ये १५ जना सम्पर्कमा आएका छन् भने अन्यको अवस्था अझै अज्ञात छ।
सम्पर्कविहीनमध्ये सोलुखुम्बुका ३९, ओखलढुंगाका २०, मोरङका १६, सुनसरीका १५ र उदयपुरका १५ जना छन्।

१२ भदौ, विराटनगर । बुधबार रसुवाको भोटेकोशी हुँदै आएको बाढी पछि कोशी प्रदेशबाट सम्पर्कविहीन हुनेको संख्या १ सय ३८ पुगेको छ । बाढीपछि स्थानीय प्रशासनले सम्पर्क बिहिनहरुको विवरण उपलब्ध गराउन अनुरोध गरेको थियो । प्रशासनको सूचनापछि १३८ जना सम्पर्कविहीन भएको भन्दै आफन्तले जानकारी गराएका छन्।

प्रदेश प्रहरी कार्यालय विराटनगरले उपलब्ध गराएको पछिल्लो विवरण अनुसार सम्पर्कविहीन मध्ये १५ जना सम्पर्कमा आएका छन् । अन्यको अवस्था अझै अज्ञात छ ।

प्रहरीका अनुसार सम्पर्कविहीन हुनेमा सोलुखुम्बुका ३९ जना छन् । ओखलढुंगा घर भएका २० जना अझै सम्पर्कविहीन छन् । मोरङबाट १६ जना, सुनसरीबाट १५ जना, उदयपुरबाट १५ जना सम्पर्कविहीन रहेको प्रदेश प्रहरी प्रवक्ता एसएसपी योगेन्द्रसिंह थापाले जानकारी दिएका छन् ।

झापाका १० जना सम्पर्कविहीन छन् । इलामका ७ जना सम्पर्कविहीन छन् । खोटाङका ८ जना, संखुवासभाका ३ जना, धनकुटाका तथा ताप्लेजुङका २–२ जना र भोजपुरका १ जना अझै सम्पर्कविहीन रहेको प्रदेश प्रहरी कार्यालय विराटनगरले जनाएको छ ।

रोजगारी, व्यापार, पर्यटन, अन्य काम तथा धार्मिक भ्रमणका लागि रसुवा, नुवाकोट, धादिङलगायतका बाढी प्रभावित क्षेत्रमा पुगेकाहरु बाढीपछि सम्पर्कविहीन भएको प्रहरीको भनाइ छ ।