प्रिमियर इन्टरनेसनल र जापानको आसाहिजुकु सेकेन्डरी स्कुलबीच शैक्षिक साझेदारी

३० भदौ, ललितपुर । प्रिमियर इन्टरनेसनल आईबी कन्टिन्युम स्कुलले जापानको मित्सुआसाही एजुकेसनल फाउन्डेसनअन्तर्गतको आसाहिजुकु सेकेन्डरी स्कुलसँग शैक्षिक तथा सांस्कृतिक सहकार्यका लागि समझदारीपत्र (एमओयू) मा हस्ताक्षर गरेको छ।

यो प्रिमियर इन्टरनेसनल आईबी कन्टिन्युम स्कुलको कुनै अन्तर्राष्ट्रिय शैक्षिक संस्थासँग भएको पहिलो औपचारिक साझेदारी हो। समझदारीपत्रमार्फत नेपाल र जापानका विद्यार्थी तथा शिक्षकबीच शैक्षिक, सांस्कृतिक तथा अनुभव आदानप्रदानका लागि सहकार्यको आधार तयार भएको विद्यालयले जनाएको छ।

‘सेपिङ द फ्युचर अफ लर्निङ अक्रस कल्चर्स’ भन्ने मूल भावसहित अघि बढाइएको साझेदारीले दुवै संस्थाका विद्यार्थी तथा शिक्षकलाई फरक शैक्षिक तथा सांस्कृतिक परिवेश बुझ्ने, नयाँ दृष्टिकोणसँग परिचित हुने र एकअर्काबाट सिक्ने अवसर प्रदान गर्ने लक्ष्य राखेको छ।

साझेदारीअन्तर्गत विद्यार्थी तथा शिक्षकबीच अन्तरक्रिया, सांस्कृतिक आदानप्रदान, साझा सिकाइ अनुभव तथा विभिन्न शैक्षिक अभ्याससम्बन्धी अनुभव आदानप्रदानका कार्यक्रम सञ्चालन गरिने अपेक्षा गरिएको छ।

इन्टरनेसनल ब्याकलरियट (आईबी) शिक्षाले जिज्ञासा, खोज, आत्मचिन्तन, फरक दृष्टिकोणको सम्मान तथा विश्वप्रतिको खुला सोचलाई प्राथमिकता दिने भएकाले यो सहकार्य प्रिमियरको शैक्षिक दृष्टिकोणसँग पनि जोडिएको विद्यालयले जनाएको छ।

यसै क्रममा जापानबाट आएको वरिष्ठ शिक्षाविद्हरूको प्रतिनिधिमण्डलले प्रिमियर इन्टरनेसनलको भ्रमणसमेत गरेको थियो। भ्रमणका क्रममा प्रतिनिधिमण्डलले विद्यालयका कक्षाकोठा, सिकाइस्थल तथा विद्यार्थीका विभिन्न शैक्षिक र अतिरिक्त क्रियाकलापको अवलोकन गरेको थियो।

प्रतिनिधिमण्डलले विद्यार्थी तथा शिक्षकसँग अन्तरक्रिया गर्दै प्रिमियरको शिक्षण–सिकाइ अभ्यासबारे जानकारी लिनुका साथै जापानको शैक्षिक अनुभव तथा अभ्याससमेत साझा गरेको थियो। यसले दुई फरक शैक्षिक परिवेशबीच प्रत्यक्ष अनुभव तथा विचार आदानप्रदानको अवसर सिर्जना गरेको विद्यालयले जनाएको छ।

नेपाल र जापानको सामाजिक, सांस्कृतिक तथा शैक्षिक परिवेश फरक भए पनि विद्यार्थीमा जिज्ञासा, सिक्ने चाहना, फरक दृष्टिकोणको सम्मान तथा विश्वसँग जोडिने सोच विकास गर्ने विषयमा दुवै संस्थाबीच साझा आधार रहेको विद्यालयको भनाइ छ।

साझेदारीले विद्यार्थीलाई कक्षाकोठाको सिकाइभन्दा बाहिर गएर अर्को देशको संस्कृति र जीवनशैली बुझ्ने, फरक दृष्टिकोणसँग परिचित हुने तथा अन्तर्राष्ट्रिय वातावरणमा संवाद र सहकार्य गर्ने अवसर प्रदान गर्ने अपेक्षा गरिएको छ। त्यस्तै, शिक्षकलाई पनि फरक शिक्षण अभ्यास र अनुभवबाट सिक्ने तथा आफ्ना अभ्यासलाई नयाँ दृष्टिकोणबाट हेर्ने अवसर सिर्जना हुने जनाइएको छ।

जापानी प्रतिनिधिमण्डलको प्रिमियर भ्रमणका क्रममा कक्षा ४ का केही विद्यार्थीले पौडी कक्षातर्फ जाँदै गर्दा मुस्कुराउँदै ‘कोन्निचिवा’ भन्दै प्रतिनिधिमण्डललाई स्वागत गरेका थिए। विद्यालयका अनुसार विद्यार्थीको उक्त सहज अभिवादन दुई फरक संस्कृतिबीचको सम्बन्ध र अन्तर्राष्ट्रिय सोचको एउटा अर्थपूर्ण उदाहरण बनेको थियो।

प्रिमियरका लागि अन्तर्राष्ट्रिय सोच पाठ्यक्रममा मात्र सीमित विषय नभई विद्यार्थीले दैनिक जीवनमा फरक संस्कृति र मानिससँगको सम्बन्धमार्फत अनुभव गर्ने सिकाइसमेत हो।

प्रिमियर इन्टरनेसनल र आसाहिजुकु सेकेन्डरी स्कुलबीचको यो साझेदारीले आगामी दिनमा नेपाल र जापानका विद्यार्थी तथा शिक्षकबीच थप सहकार्य, अनुभव आदानप्रदान तथा साझा सिकाइका अवसर विस्तार गर्ने अपेक्षा गरिएको छ।