‘आफूलाई दुःख पर्दा चट्टानझैं उभिएकी श्रीमतीलाई धन्यवाद’ राजपाल यादव

बलिउड अभिनेता राजपाल यादव यतिबेला आफ्ना फिल्मभन्दा बढी चेक बाउन्स प्रकरणका कारण चर्चामा छन् । एकातिर उनले १४ वर्षपछि अदालतले आफ्नो पक्ष राख्ने मौका दिएको भन्दै सर्वोच्च अदालतलाई धन्यवाद दिएका छन् भने अर्कोतिर २२ करोड भारुको नयाँ दाबीमाथि प्रश्न उठाएका छन् ।

यसबीच ५५ वर्षीय राजपालले सामाजिक सञ्जालमा लामो पोस्ट लेख्दै पत्नी राधालाई धन्यवाद दिएका छन् । उनी लेख्छन्, ‘ माता-पिता, गुरु र परम पिता परमेश्वर, परमात्मा रूपी ब्रह्माण्डपछि, यदि मेरो जीवनमा कसैको सबैभन्दा ठूलो ऋण छ भने, त्यो मेरी प्रिय राधाको हो ।’

यो ऋणलाई म हृदयदेखि, खुशी-खुशी सधैंका लागि स्वीकार गर्दछु र यो कुरामा गर्व पनि गर्दछु कि तिमी मेरो जीवनमा आयौ । जीवनको आपत्-विपत्तिको हरेक मोडमा, हरेक कठिन घडीमा, आफ्नो अस्तित्व नगुमाई, तिमीले मेरो साथ कहिल्यै छोडिनौ  ।

मेरो साथमा यति धेरै कुरा सहनुपरेपछि पनि, तिमीले मेरो परिवारका बच्चाहरूलाई राम्ररी पढाए-लेखायौ र उनीहरूलाई जीवनको पाठ सिकायौ । यो सपना मेरो थियो, तर यसलाई पूरा तिमीले गर्यौ।  आजसम्म तिमीले मबाट आफ्ना लागि केही पनि मागेकी छैनौ, बरु आफ्नो सबै कुरा मेरो र मेरो परिवारको खुशीका लागि समर्पण गरिदियौ ।’

राजपाल यादवको फिल्मको जस्तै प्रेमकथा

सबैको अनुहारमा मुस्कान ल्याउने अभिनेता राजपाल यादवले आफ्नो जीवनमा धेरै दुःख पनि भोगेका छन् । ती कठिन समयमा उनकी पत्नी राधा चट्टानझैँ साथमा उभिइन् । पहिलो पत्नीको निधनपछि राधा कसरी उनको जीवनको हिस्सा बनिन्रु उनीहरूको प्रेमकथा कुनै फिल्मको कथाभन्दा कम छैन ।

प्रेमलाई विवाहमा परिणत गर्न उनीहरूले विभिन्न कठिनाइको सामना गर्नुपरेको थियो ।

राधाका अनुसार सुरुमा उनका आमाबुबा विवाहका लागि तयार थिएनन् । यसको मुख्य कारण उनीहरूबीचको १३ वर्षको उमेर अन्तर थियो । तर पछि परिवारले उनीहरूको सम्बन्धलाई स्वीकार गर्‍यो ।

राधा क्यानडाकी हुन् । राजपाल फिल्मको छायांकनका लागि क्यानडा पुगेका बेला उनीहरूको भेट भएको थियो । एक साझा साथीमार्फत उनीहरूको चिनजान भएको थियो । त्यसपछि राजपाल राधाका आमाबुबालाई भेट्न उनको घरसमेत पुगेका थिए । त्यतिबेला उनीहरूको विवाह हुन्छ कि हुँदैन भन्ने निश्चित थिएन ।

उनीहरू करिब १० महिना लामो दूरीको प्रेम सम्बन्धमा रहे । सन् २००३ मा राधा भारत आइन् र त्यसपछि उनीहरूले विवाह गरे।

विवाहपछि पनि पढाइलाई प्राथमिकता

राजपाल यादवले विवाहपछिको जीवनबारे कुरा गर्दै शिक्षाको महत्त्वसमेत बताएका छन् । उनले विवाहपछि राधालाई आफ्नो पढाइ पूरा गर्न प्रोत्साहित गरेका थिए।

राधाले आफ्ना अधुरा इच्छा पूरा गर्दै इन्टेरियर डिजाइनिङको अध्ययन गरिन् । उनले अन्तर्राष्ट्रिय स्तरमा अध्ययन गर्नुका साथै लन्डन र दुबईमा तालिम लिएर आफ्नो कोर्स पूरा गरिन् ।

राजपालको विचारमा विवाहले व्यक्तिको प्रगतिमा बाधा पुर्‍याउनु हुँदैन । बरु, दम्पतीले एकअर्कालाई अघि बढ्न सहयोग गर्नुपर्छ । उनीहरूको सम्बन्धले पनि यही सोचलाई प्रतिबिम्बित गर्छ ।

पहिलो पत्नीको निधनपछि राधासँग विवाह

राजपाल यादवले विभिन्न अन्तर्वार्तामा आफ्नो पहिलो विवाह करुणासँग भएको बताएका छन् । तर विवाहको केही महिनापछि नै करुणाको निधन भएको थियो । त्यसपछि उनले राधासँग नयाँ जीवन सुरु गरे ।

जीवनका विभिन्न कठिन परिस्थितिमा राधाले राजपाललाई साथ दिँदै आएकी छन् । राजपालका लागि उनी केवल जीवनसाथी मात्र नभई सुखदुःखकी भरपर्दो साथी पनि हुन् ।