म्युचुअल फण्ड

अधिकांश लगानी सल्लाहकारले लगानीकर्तालाई उनीहरूको वित्तीय लक्ष्य, जोखिम सहनशीलता र लगानीको अवधिका आधारमा लगानी योजना बनाउन भन्छन् । प्रत्येक व्यक्तिको आवश्यकता र आकांक्षा फरक हुन्छ । लगानीकर्तालाई उच्च जोखिम वा कम जोखिम लिने व्यक्तिको रूपमा वर्गीकरण गर्न कठिन  हुन्छ । यस्तो अवस्थामा हाइब्रिड म्युचुअल फन्ड उपयोगी हुन्छ ।

योजनाको लगानी लक्ष्य पूरा गर्न सिर्जना गरिएको डेब्ट (ऋणपत्र) र इक्विटी (शेयर) जस्ता सम्पत्तिहरूमा मिश्रित लगानी गर्ने म्युचुअल फन्ड हाइब्रिड फन्ड हो । प्रत्येक हाइब्रिड फन्डमा विभिन्न प्रकारका लगानीकर्तालाई लक्षित इक्विटी र ऋणको फरक–फरक संयोजन हुन्छन् ।

हाइब्रिड फन्ड कसरी सञ्चालन हुन्छ ?

हाइब्रिड फन्डले लगानीकर्तालाई दीर्घकालीन पूँजी वृद्धि र लगातार प्रतिफल प्रदान गर्ने हेतुले सन्तुलित पोर्टफोलियो निर्माण गर्ने लक्ष्य राख्छ । कोष प्रबन्धकले योजनाको लगानी लक्ष्यमा आधारित पोर्टफोलियो बनाउँछ र ऋण तथा इक्विटी धितोपत्रहरूमाथि विभिन्न अनुपातमा लगानी गर्छ ।

हाइब्रिड फन्डमा कसले लगानी गर्नुपर्छ ?

हाइब्रिड कोषलाई ऋण कोष भन्दा जोखिमपूर्ण तर इक्विटी कोषभन्दा सुरक्षित मानिन्छ । ऋण कोषहरू भन्दा राम्रो प्रतिफल र कम जोखिमयुक्त लगानी रोज्नेले यस्तो फन्डमा लगानी गर्न रुचाउँछन् । यसबाहेक हाइब्रिड कोषहरू प्रायः नयाँ लगानीकर्ताहरूका लागि पहिलो रोजाइ हुनसक्छ, जो स्टक बजारमा प्रवेश गर्न हिचकिचाउँछन् ।

हाइब्रिड कोषहरूमा लगानीकर्ताहरूले तीव्र बजार उतारचढावबाट आफूलाई सुरक्षित राख्दै लगानीमा अधिकतम प्रतिफल हासिल गर्न सक्छन् ।