म्युचुअल फण्ड

योजनाबद्ध तरिकाले नियमित रूपमा लगानी गर्ने विधि व्यवस्थित लगानी योजना (Systemic Investment Plan, SIP) हो । यो म्युचुअल फन्डमा पैसा लगानी गर्ने एक अनुशासित र व्यवस्थित तरिका हो । एसआईपी (SIP) मा लगानीकर्ताले निश्चित म्युचुअल फन्ड योजनामा निर्धारित अन्तरालमा (मासिक, त्रैमासिक, अर्धवार्षिक) नियमित रूपमा लगानी गर्छ ।

लगानीकर्तालाई सबै खाले बजार अवस्थामा भाग लिने अवसर यसले दिन्छ । लगानीको रकम स्थिर रहँदा वा मूल्य कम हुँदा समयसँगै औसत लागतका आधारमा म्युचुअल फन्डको धेरै इकाई र मूल्य उच्च हुँदा थोरै इकाई खरिद गरिन्छ । SIP ले वित्तीय अनुशासनलाई बढावा दिन्छ र दीर्घकालीन सम्पत्ति निर्माणमा सघाउ पुर्‍याउँछ ।

SIP नेपाली लगानीकर्तामा लोकप्रिय हुँदैछ किनकि यसले बजारको अस्थिरता र समयको बारेमा चिन्ता नगरी अनुशासित ढंगले लगानी गर्न मद्दत गर्छ । म्युचुअल फन्डद्वारा प्रस्तावित प्रणालीगत लगानी योजनाहरू दीर्घकालीन रूपमा लगानीको संसारमा प्रवेश गर्ने सजिलो उपाय हो । यो लामो अवधिको लगानीका लागि महत्वपूर्ण छ । प्रतिफल अधिकतम गर्नको लागि यसमा चाँडै लगानी सुरु गर्नुपर्छ ।

SIP ले कसरी काम ?

SIP मार्फत गरिने लगानी विस्तारै समय अनुसार मासिक वा त्रैमासिक रूपमा निश्चित रकम लगानी गर्न सकिन्छ । यसमा लगानीको औसत लागत निकाल्दै चक्रवृद्धि ब्याजको फाइदा लिन सकिन्छ । जबसम्म तपाईंको लगानी भइरहन्छ तपाईंको पैसा समयसँगै कम्पाउन्डिङको नियमानुसार बढ्दै जान्छ । बजार तपाईंको समय अनुसार हैन समय अनुसार तपाईं बजारमा जोडिनु आवश्यक छ ।

लगानीकर्ताले SIP छनोटको लागि आवेदन दिनुपर्ने हुन्छ । यसमा लगानीकर्ताले SIP मिति, योजनाको रकम, समयावधि र मासिक किस्ता जस्ता आवश्यक जानकारी उपलब्ध गराउनुपर्छ । लगानीकर्ताले आफ्नो सुविधाको आधारमा चेक वा अनलाइनको माध्यमबाट लगानी रकम पठाउन सक्छन् ।

SIP क्याल्कुलेटरले तपाईंलाई SIP मार्फत गरिएको लगानीमा प्रतिफल अनुमान गर्न सिकाउँछ । SIP क्याल्कुलेटर लगानीकर्तालाई सम्भावित म्युचुअल फन्डहरूको सामान्य प्रतिफलको जानकारी दिने गरी  डिजाइन गरिएको हुन्छ । यद्यपि म्युचुअल फन्ड योजनाबाट आउने वास्तविक प्रतिफल विभिन्न कारकहरूमा निर्भर रहन्छ ।  SIP क्याल्कुलेटर अपेक्षित वार्षिक प्रतिफलको आधारमा तपाईंको वित्तीय लक्ष्य प्राप्त गर्न SIP रकम गणना गर्ने अनलाइन उपकरण हो ।