एनसेल कार्यालय भ्रमणमा सञ्चारमन्त्री खरेल, सरकारी सहयोगको प्रतिबद्धता

News Summary

Generated by OK AI. Editorially reviewed.

सञ्चार तथा सूचना प्रविधिमन्त्री जगदीश खरेलले जेनजी आन्दोलनमा एनसेलमा भएको क्षति समाधानका लागि सरकारले पहल गर्ने प्रतिबद्धता व्यक्त गरे।
एनसेलले जेनजी लक्षित प्याक सार्वजनिक गर्ने र १ सय विद्यार्थीलाई १ करोड रुपैयाँ बराबरको छात्रवृत्ति दिने तयारी गरेको छ।
एनसेलले सगरमाथा क्षेत्रमा थप पाँच टावर स्थापना गरी फोरजी सेवा विस्तार गर्ने योजना सुनाएको छ।

२२ मंसिर, काठमाडौं । सञ्चार तथा सूचना प्रविधिमन्त्री जगदीश खरेलले जेनजी आन्दोलन क्रममा एनसेलमा भएको क्षतिसम्बन्धी समस्या समाधानका लागि सरकारले आवश्यक पहल गर्ने प्रतिबद्धता व्यक्त गरेका छन् ।

सोमबार एनसेलको कार्यालय तथा डेटा सेन्टरको अवलोकन गर्दै सञ्चारमन्त्री खरेलले पछिल्लो समय एनसेलसँग सम्बन्धित समस्या समाधानका लागि पनि सरकार प्रयासरत रहेको बताएका हुन् ।

‘केही नीतिगत समस्या छन्, केही विवाद पनि देखिएका छन्, यद्यपि यी सबै कानुनसम्मत समाधान हुनुपर्छ भन्नेमा सरकार छ,’ सञ्चारमन्त्री खरेलले भने ।

मन्त्री खरेलले एनसेलको सेयर सम्बन्धी विवाद, भुक्तानी दायित्व लगायत सबै विवाद चाँडो समाधान गरिनुपर्नेमा जोड दिए ।

‘राज्य र नागरिकको नजरमा एनसेलको बिजनेस सम्मानित हुनुपर्‍यो, जति पनि विवाद छन्, तिनको समाधान गरेर क्लिन बिजनेस र सर्भिस दिनेतर्फ केन्द्रित हुन आग्रह गर्दछु,’ खरेलले भने, ‘क्लिन बिजनेसका लागि सरकारको साथ र सहयोग रहन्छ ।’

मन्त्री खरेललाई एनसेल कार्यालयमा अध्यक्ष सतिशलाल आचार्य र प्रमुख कार्यकारी अधिकृत (सीईओ) माइकल फोलेले स्वागत गरेका थिए । त्यस क्रममा एनसेलले जेनजी आन्दोलनमा भएको क्षतिबारे जानकारी गराएको थियो ।

२४ भदौमा भएको जेनजी आन्दोलन क्रममा एनसेलको लैनचौरस्थित केन्द्रीय कार्यालय क्षतिग्रस्त भएपछि एनसेलले नख्खुस्थित कार्यालयबाट सेवा प्रवाह गरिरहेको छ ।

एनसेलका अनुसार करिब ६५ करोड बराबर क्षति भएको थियो । अवलोकनपछि मन्त्री खरेलले आफूले एनसेलमा भएको क्षतिबारे जानकारी लिन आएको बताए । एनसेलले जेनजीलाई लक्षित गरी ‘प्याक’ ल्याउन लागेको सुन्दा खुसी लागेको पनि मन्त्री खरेलले उल्लेख गरे ।

‘मैले उहाँहरूलाई विद्यार्थी र जेनजीका लागि केही गर्नुहोस् भनेको थिएँ, उहाँहरूले नयाँ प्याकेज ल्याउँछौं भन्नुभएको छ,’ सञ्चारमनत्री खरेलले भने, ‘त्यसबाहेक सगरमाथा आधार शिविर र केही दुर्गम स्थानमा टेलिकमको पहुँच बढाउने विषयमा उहाँहरूले आफ्नो योजना सुनाउनुभएको छ ।’

उनले एनसेलमा ठूलो क्षति भएको उल्लेख गर्दै सरकारबाट हुन सक्ने सहयोगका लागि तयार रहेको समेत बताए ।

एनसेलका अनुसार कम्पनीले जेनजी लक्षित गरी प्याक सार्वजनिक गर्ने र मुलुकभरिका १ सय विद्यार्थीलाई १ करोड राशिको जेनजी छात्रवृत्ति पनि घोषणाको तयारी गरेको छ ।

एनसेलका तर्फबाट मन्त्री खरेललाई सगरमाथामा क्षेत्रको गोरखसेपसम्म थप पाँच टावर थप गरी ‘फोरजी’ सेवा विस्तार गर्न लागेको जानकारी गराइएको थियो ।