‘चिरञ्जीवि भवः’ बाट फिल्ममा डेब्यू गर्दै टिकटकर प्रशंसा रायमाझी

News Summary

Generated by OK AI. Editorially reviewed.

चर्चित कन्टेन्ट क्रिएटर प्रशंसा रायमाझीले फिल्म 'चिरञ्जीवि भवः'मा अभिनय गर्दै नेपाली फिल्ममा डेब्यू गर्ने भएकी छन्।
फिल्म 'चिरञ्जीवि भवः' सामाजिक ड्रामा जनरामा निर्माण हुँदैछ र दुई पुस्ताबीचको वैचारिक भिन्नता र सम्बन्धमा केन्द्रित छ।
फिल्मको औपचारिक घोषणा नयाँ वर्ष २०८३ मा गरिएको थियो र काकुले निर्देशन गर्नेछन् भने पटकथा जिग्री ब्रोले लेखेका छन्।

काठमाडौं । चर्चित कन्टेन्ट क्रिएटर तथा टिकटकर प्रशंसा रायमाझीले नेपाली फिल्म अभिनयमा डेब्यू गर्ने भएकी छन् । कुमार कट्टेल ‘जिग्री ब्रो’ र दीपक आचार्य ‘काकु’ले निर्माण गर्न लागेको फिल्म ‘चिरञ्जीवि भवः’मा उनले अभिनय गर्ने जनाइएको हो ।

यो फिल्मको औपचारिक घोषणा मंगलबार नयाँ वर्ष २०८३ को अवसरमा गरिएको थियो । यो फिल्मलाई काकुले निर्देशन गर्नेछन् भने पटकथा जिग्री ब्रोको हुनेछ ।

रायमाझी पछिल्लो समय क्रिकेटर कुशल भुर्तेलसँगको प्रेम सम्बन्धले चर्चामा छिन् ।

फिल्मको कुरा गर्दा, ‘चिरञ्जीवी भवः’ सामाजिक ड्रामा जनरामा निर्माण हुनेछ । यसको मुख्य विषयवस्तु दुई पुस्ताबीचको वैचारिक भिन्नता र सम्बन्धमा केन्द्रित रहने लेखक कट्टेलले जानकारी दिए ।

उनका अनुसार फिल्मको कथा अहिलेकै समयको हो । सविन अधिकारी र बसन्त न्यौपाने लेखकका रूपमा छन् ।

यसअघि काकुले निर्देशन गरेको फिल्म ‘परान’ २०८२ सालको सर्वाधिक कमाउने फिल्म बनेको थियो । त्यस्तै, कट्टेलको निर्देशन र अभिनय रहेको ‘लाज शरणम्’ ले पनि व्यावसायिक रूपमा राम्रो सफलता हासिल गरेको थियो ।

लाखौँ फलोअर्स कमाएकी रायमाझीको डेब्यूलाई लिएर उनका प्रशंसक खुसी छन् ।