खुम्बु आइसफलमा दुई जना घाइते, उपचारका लागि काठमाडौं ल्याइयो

News Summary

Generated by OK AI. Editorially reviewed.

सगरमाथा आधार शिविरबाट दोस्रो शिविरतर्फ जाने क्रममा खुम्बु आइसफलमा ठूलो सेराक भत्किँदा भारतीय आरोही निमिस कुमार सिंह र शेर्पा गाइड पेम्बा टेन्डुक घाइते भएका छन्।
घटना बिहान ५ः४५ बजे भएको थियो र उद्धारका लागि लुक्लाबाट हेलिकप्टर ६ः३० बजे घटनास्थलमा पुगेको थियो।
उनीहरूलाई काठमाडौंस्थित ह्याम्स अस्पतालमा उपचारका लागि ल्याइएको छ र अवस्था खतरामुक्त रहेको पर्यटन विभागले जनाएको छ।

२२ वैशाख, काठमाडौं । सगरमाथा आधार शिविरबाट दोस्रो शिविरतर्फ रोटेसनका लागि जाने क्रममा खुम्बु आइसफलमा आरोही र शेर्पा गाइड घाइते भएका छन् ।

पर्यटन विभागका अनुसार गत साता मात्र खुला गरिएको खुम्बु आइसफलमा जोखिमपूर्ण मानिएको ठूलो सेराक (हिँउको थुम्का) भत्किएर आरोही हिँड्ने बाटोसम्म आइपुगेको थियो ।

सो सेराकका कारण एक भारतीय (पुने) का आरोही ४० वर्षीय निमिस कुमार सिंह र गाइड ४४ वर्षीय पेम्बा टेन्डुक शेर्पालाई चोट लागेको छ । घटना आज बिहान ५ः४५ बजे भएको हो । घटनालगत्तै पायोनियर एडभेन्चर प्रालि र समिट फोर्स एक्स्पिडिसनका शेर्पा गाइड टोलीले तत्काल उद्धार गरी आधार शिविरमा खबर गरेको थियो ।

आधार शिविरबाट सेभेन समिटको टोलीले समन्वय गरेपछि ६ः३० बजे लुक्लाबाट हेलिकप्टर घटनास्थलमा पुगी आरोहीलाई उद्धार गरिएको थियो ।

सेभेन समिट ट्रेकका अनुसार उनीहरुलाई अहिले काठमाडौंस्थित ह्याम्स अस्पतालमा उपचारका लागि ल्याइएको छ । उनीहरूको अवस्था खतरामुक्त रहेको समेत विभागले जनाएको छ ।