बाढीले अवरुद्ध पृथ्वी राजमार्ग एकतर्फी सञ्चालनमा, बैरेनीमा अझै लेदो पन्छाउन बाँकी

फाइल तस्वीर

News Summary

Generated by OK AI. Editorially reviewed.

रसुवाको भोटेकोशीमा आएको बाढीले धादिङको बैरेनीदेखि गलौदीसम्मको काठमाडौं-मुग्लिन सडकमा थुपारेको लेदो पन्छाएपछि शुक्रबार राति ८ बजेदेखि सडक एकतर्फी सञ्चालनमा आएको छ।
सुरक्षा तथा ट्राफिक व्यवस्थापन कार्यालय रामनगरका प्रमुख डिल्ली नारायण पाण्डेले बैरेनी क्षेत्रमा केही लेदो बाँकी रहेकाले तत्काल दुईतर्फी यातायात सञ्चालन नगरिएको बताए।
उनले सवारीसाधनको चाप भएका ठाउँमा सुरक्षाकर्मी राखेर सहजीकरण गरिएको र दुईतर्फी सडक सञ्चालन गर्ने योजना रहेको बताए।

१३ भदौ, काठमाडौं । पृथ्वी राजमार्ग एकतर्फी रूपमा सञ्चालनमा आएको छ ।

रसुवाको भोटेकोशीमा बुधबार आएको विनाशकारी बाढीले धादिङको बैरेनीदेखि गलौदीसम्मको काठमाडौं-मुग्लिन सडकमा लेदो थुपारेको थियो ।

बाढीले ठाउँठाउँमा थुपारेको लेदो पन्छाएपछि शुक्रबार राति ८ बजेदेखि सडक एकतर्फी सञ्चालनमा आएको सुरक्षा तथा ट्राफिक व्यवस्थापन कार्यालय, रामनगरका प्रमुख डिल्ली नारायण पाण्डेले अनलाइनखबरलाई जानकारी दिए ।

पृथ्वी राजमार्ग अन्तर्गत धादिङको बैरेनीमा लेदो पूर्ण रूपमा पन्छाउन बाँकी रहेकोले सडक एकतर्फी सञ्चालनमा आएको उनको भनाइ छ ।

उनले भने, ‘शुक्रबार राति ८ बजेतिर सडक वान वे सञ्चालनमा ल्याएका हौं । बाढीका कारण राजमार्गका ठाउँठाउँमा अलपत्र अवस्थामा रहेका सवारीसाधनलाई प्राथमिकतामा राखेर गन्तव्यतर्फ पठाउने काम गरेका थियौं ।’

सडकमा सवारीको चाप रहेकाले समस्या भएका ठाउँठाउँमा सुरक्षाकर्मी राखेर सहजीकरण गरिएको उनले बताए ।

उनले भने, ‘बैरनी क्षेत्रमा केही समस्या छ । दुई चार घण्टामा उक्त ठाउँको लेदो पन्छाउन त सकिन्छ । तर सडकमा सवारी सञ्चालन गरेर लेदो पन्छाउँदा काम गर्न असहज हुन सक्छ । दुईतर्फी सडक सञ्चालनमा ल्याउने गरी काम गर्ने योजना छ ।’