जब ट्रम्पले एनभिडियाका सीईओ ह्वाङलाई कार्यक्रमस्थलमै फोन गरे

३० भदौ, काठमाडौं । सोमबार बिहान लस एन्जलसमा भएको ‘अल-इन समिट’मा एनभिडियाका सीईओ जेन्सेन ह्वाङ स्टेजमा थिए। त्यही बेला उनलाई अमेरिकी राष्ट्रपति डोनाल्ड ट्रम्पको फोन आयो। ह्वाङले फोन स्पीकरमा राखेर हलका दर्शकहरूले पनि सुन्न सक्ने गरी कुराकानी गराए।

‘म अहिले ‘बेस्टिज’सँग स्टेजमा छु,’ ह्वाङले ट्रम्पलाई भने। उनले ‘बेस्टिज’ भनेर अल-इन पोडकास्ट होस्ट गर्ने भेन्चर क्यापिटलिस्टहरूलाई जनाएका थिए, जसमा क्यामाथ पालिहापिटिया, जेसन क्यालाकानिस, र ट्रम्प प्रशासनका सल्लाहकार डेभिड फ्रिडबर्ग र डेभिड स्याक्स थिए।

मञ्चमा त्यतिबेला एन्थ्रोपिकका सीईओ डारियो अमोदेईले ‘एआइ विकासको गति सुस्त पार्नुपर्छ’ भन्ने आह्वानबारे छलफल भइरहेको थियो। इलन मस्क र स्याम अल्टम्यानजस्ता केही प्रविधि नेताहरूले अमोदेईको धारणा समर्थन गरेका थिए भने ह्वाङको धारणा फरक थियो।

ट्रम्पले यस्तो अभियानलाई ‘होक्स’ (ढाँट) भनेर खण्डन गरे। ‘तिनीहरू त्यस्ता मान्छेहरूको चालमा परेका हुन् जसले यो हुन चाहँदैनन्। त्यो राजनीतिक मान्छे हुन सक्छ। चीन पनि हुन सक्छ। र हामी यो हुन दिँदैनौं। यो एउटा होक्स हो,’ ट्रम्पले फोनमा भने। ‘तपाईं ठिक हुनुहुन्छ। हामी यो हुन दिँदैनौं, सर,’ ह्वाङले जवाफ दिए।

भीडमा ताली बज्यो। ट्रम्प र उनका सहयोगीहरूले डेटा सेन्टर निर्माणविरुद्ध बढ्दो विरोधलाई पनि अमेरिकी आर्थिक वृद्धि कुल्चने अन्तर्राष्ट्रिय ‘साइओप’ (मनोवैज्ञानिक अभियान) को रूपमा चित्रण गरेका छन्।

‘हामी अलि सावधान हुनुपर्छ… हामीले काम गर्नुपर्छ र सावधानीपूर्वक गर्नुपर्छ, तर त्यसको अर्थ हामी उद्योग रोक्छौं भन्ने होइन,’ ट्रम्पले ह्वाङलाई थप भनेका थिए, ‘त्यसैले म तपाईंहरूका साथ अन्तिमसम्म छु। मलाई त तपाईंको भावना कस्तो छ भनेर पनि थाहा थिएन। मले आशा मात्र गरेको थिएँ कि तपाईंको भावना मेरो जस्तै हुन्छ। हामी नै यसको नेतृत्व गर्नेछौं।’