कफी विथ करण–९ मा रश्मिका भन्छिन्, ‘विजयसँग विवाह गर्न एक वर्षसम्म पछि लागेँ’

बलिउड निर्माता तथा निर्देशक करण जोहरको चर्चित सेलिब्रिटी च्याट शो ‘कफी विथ करण–९’ को दोस्रो एपिसोडको प्रोमो सार्वजनिक भएको छ । यस एपिसोडमा वास्तविक जीवनका जोडी दक्षिण भारतीय अभिनेता विजय देवरकोंडा र अभिनेत्री रश्मिका मन्दाना सँगै देखिनेछन् । प्रोमोमा दुवैले आफ्नो प्रेमसम्बन्ध र वैवाहिक जीवनबारे केही रोचक खुलासा गरेका छन् ।

विवाहका लागि को पहिले पछि लाग्यो ?

कार्यक्रममा करणले विजय र रश्मिकालाई विवाहका लागि कसले पहिले पहल गरेको थियो भनेर सोधेका छन् । जवाफमा विजयले हाँस्दै रश्मिकाले नै आफूलाई विवाह गरौँ भनेर पटक–पटक सोधेको बताए । उनका अनुसार, रश्मिकाले करिब सय पटक यस्तो प्रश्न गरेकी थिइन् ।

विजयको जवाफपछि रश्मिकाले आफू लगभग एक वर्षसम्म विजयलाई विवाहका लागि मनाउन पछि लागेको बताइन् । उनीहरूको यो संवादले कार्यक्रमको प्रोमोमा रोचक माहोल सिर्जना गरेको छ ।

अल्लु अर्जुन कि रणबीर कपूर ?

कार्यक्रममा करणले रश्मिकालाई अल्लु अर्जुन र रणबीर कपूरमध्ये कससँग काम गर्दा बढी रमाइलो लागेको थियो भनेर सोधेका छन् । रश्मिकाले दक्षिण भारतीय अभिनेता अल्लु अर्जुनको नाम लिएकी छन् ।

त्यसैगरी, करणले विजयलाई रश्मिकाबाहेक अरू कुन अभिनेत्रीको जोडी पर्दामा राम्रो देखिन्छ भनेर सोध्दा रश्मिकाले ‘कोही पनि होइन’ भन्दै जवाफ दिएकी छन् । त्यसपछि विजयले ठट्टा गर्दै विवाहको पहिलो नियम भनेकै आफ्नी पत्नीको कुरामा सहमत हुनु रहेको बताएका छन् ।

कार्यक्रमको यो एपिसोड आगामी बुधबार प्रसारण हुने जनाइएको छ ।

फेब्रुअरीमा विवाह गरेका थिए विजय र रश्मिकाले

दक्षिण भारतीय चलचित्रका चर्चित कलाकार विजय देवरकोंडा र रश्मिका मन्दानाले सन् २०२६ फेब्रुअरी २६ मा विवाह गरेका थिए । उनीहरूको विवाह समारोह भारतको राजस्थानस्थित उदयपुरमा निजी रूपमा सम्पन्न भएको थियो ।

समाचारअनुसार, बिहान तेलुगु परम्पराअनुसार विवाह गरिएको थियो भने साँझ रश्मिकाको पारिवारिक पृष्ठभूमिसँग जोडिएको कोडवा परम्परा पनि अपनाइएको थियो । विवाहमा रश्मिकाले फेसन डिजाइनर अनामिका खन्नाले तयार पारेको साडी लगाएकी थिइन् भने विजय परम्परागत धोतीमा देखिएका थिए ।

पहिलो एपिसोडमा सलमान खान

‘कफी विथ करण–९’ को पहिलो एपिसोडमा अभिनेता सलमान खान सहभागी भएका थिए । कार्यक्रममा उनले चलचित्र क्षेत्रका पुराना अनुभव सुनाउनुका साथै आफ्नो निजी जीवन, विवाह र पिता बन्ने इच्छाबारे पनि कुराकानी गरेका थिए । उक्त एपिसोडमा अभिनेत्री करिश्मा कपूर पनि उपस्थित थिइन् ।