+
+
Shares

भारत भ्रमणमा श्रमिकका स्वास्थ्य र सामाजिक सुरक्षा मुद्दा उठाउन प्रधानमन्त्रीलाई आग्रह

खुला सिमाना र रोजगारी अवसरका कारण ठूलो संख्यामा नेपाली नागरिक भारतका विभिन्न सहर, औद्योगिक क्षेत्र, निर्माण, कृषि, होटल तथा अनौपचारिक क्षेत्रमा मौसमी र दीर्घकालीन रोजगारीमा संलग्न छन् ।

अनलाइनखबर अनलाइनखबर
२०८३ मंसिर ६ गते १३:००

६ मंसिर, काठमाडौं । भारत भ्रमणमा जान लागेका प्रधानमन्त्री बालेन्द्र (बालेन) शाहसमक्ष भारतमा कार्यरत नेपाली श्रमिकका स्वास्थ्य, श्रम अधिकार तथा सामाजिक सुरक्षा विषयलाई द्विपक्षीय वार्ताको प्राथमिकतामा राख्न आग्रह गरिएको छ ।

आप्रवासी कामदारहरूको एचआईभी/एड्स तथा प्रजनन स्वास्थ्य सञ्जाल नेपालले प्रधानमन्त्री शाहलाई खुला पत्र पठाउँदै भारतमा कार्यरत नेपाली श्रमिकले भोगिरहेका समस्या समाधानका लागि भारतसँग नीतिगत समझदारी गर्न आग्रह गरेको हो ।

सञ्जालका महासचिव बालकृष्ण गैरेले प्रधानमन्त्रीलाई सम्बोधन गरी पठाएको पत्रमा भारतमा काम गर्ने नेपाली श्रमिकले स्वास्थ्य उपचारमा कठिनाइ, बीमा तथा सामाजिक सुरक्षा अभाव, कार्यस्थलमा दुर्घटना, शोषण र दुर्व्यवहार जस्ता समस्या भोगिरहेको उल्लेख गरेका छन् ।

खुला सिमाना र रोजगारी अवसरका कारण ठूलो संख्यामा नेपाली नागरिक भारतका विभिन्न सहर, औद्योगिक क्षेत्र, निर्माण, कृषि, होटल तथा अनौपचारिक क्षेत्रमा मौसमी र दीर्घकालीन रोजगारीमा संलग्न छन् ।

उनीहरूको आम्दानी नेपाली परिवारको जीविकोपार्जन र राष्ट्रिय अर्थतन्त्रको महत्त्वपूर्ण आधार भए पनि उनीहरूको श्रम तथा स्वास्थ्य सुरक्षाका विषय पर्याप्त सम्बोधन हुन नसकेको सञ्जालको भनाइ छ ।

विशेषगरी एचआईभी/एड्स, यौन तथा प्रजनन स्वास्थ्य, क्षयरोग र मलेरिया लगायत स्वास्थ्य सेवामा जानकारी, पहुँच र उपचार निरन्तरता अभाव रहेको पत्रमा उल्लेख छ ।

नेपाल फर्किएर पुन: भारत जाने श्रमिकका लागि सीमापार स्वास्थ्य सेवा र उपचार रेफरलको प्रभावकारी व्यवस्था हुन नसकेको पनि सञ्जालले जनाएको छ ।

सञ्जालले प्रधानमन्त्रीको भारत भ्रमण क्रममा पाँच वटा विषयलाई प्राथमिकता साथ उठाउन आग्रह गरेको छ ।

पहिलो, नेपाली कामदार आवागमन बढी हुने ८ देखि १३ वटा प्रमुख सीमानाकामा स्वास्थ्य सहायता डेस्क स्थापना गर्नुपर्ने माग गरिएको छ । त्यस्ता डेस्कबाट स्वास्थ्य सम्बन्धी सूचना, एचआईभी तथा क्षयरोग परामर्श, परीक्षण र उपचारका लागि रेफरल सेवा उपलब्ध गराउनुपर्ने सञ्जालको प्रस्ताव छ ।

दोस्रो, भारत जाने श्रमिकलाई सम्बन्धित वडा वा स्थानीय तहबाट स्वैच्छिक स्वास्थ्य जानकारी, आवश्यक परामर्श, स्वास्थ्य परीक्षण सिफारिस र आकस्मिक सम्पर्क विवरण सहित पत्र उपलब्ध गराउने व्यवस्था गर्नुपर्ने माग छ ।

तेस्रो, नेपालका सीमावर्ती स्वास्थ्य संस्था र भारतका सरकारी अस्पताल तथा एआरटी केन्द्रबीच समन्वय गरी उपचार, औषधि र स्वास्थ्य सेवाको निरन्तरता सुनिश्चित गर्नुपर्ने प्रस्ताव गरिएको छ ।

त्यस्तै भारतमा कार्यरत नेपाली श्रमिकलाई आधिकारिक करारनामा, समान कामको समान ज्याला, सुरक्षित कार्यस्थल, दुर्घटना क्षतिपूर्ति, स्वास्थ्य तथा दुर्घटना बीमा र उपलब्ध सामाजिक सुरक्षा योजनामा पहुँच सुनिश्चित गर्न भारतसँग नीतिगत समझदारी गर्नुपर्ने सञ्जालको माग छ ।

पाँचौं विषयमा भारतका प्रमुख रोजगार गन्तव्यमा रहेका नेपाली दूतावास, प्रवासी नेपाली संघसंस्था र सम्बन्धित भारतीय निकायबीच सहकार्य गरेर श्रमिकका गुनासा सुनुवाइ, कानुनी सहायता तथा श्रमिक संरक्षण व्यवस्था गर्न आग्रह गरिएको छ ।

सञ्जालले भारतमा कार्यरत नेपाली श्रमिकका समस्या व्यक्तिगत विषयमात्र नभई नेपालको सार्वजनिक स्वास्थ्य, श्रमिक अधिकार र सामाजिक सुरक्षासँग जोडिएको राष्ट्रिय सरोकारको विषय भएको जनाएको छ ।

खुला पत्रमा उल्लेखित विषय नेपाल–भारत द्विपक्षीय वार्तामा प्राथमिकता साथ उठाएर आवश्यक नीतिगत समझदारी र कार्यान्वयन पहल गर्न प्रधानमन्त्रीसँग आग्रह गरिएको छ ।

साथै, कार्ययोजना निर्माण गर्दा सम्बन्धित सरकारी निकायसँगै नागरिक समाज र प्रवासी कामदारका प्रतिनिधिमूलक संस्थाहरूको अर्थपूर्ण सहभागिता सुनिश्चित गर्न पनि माग गरिएको छ ।

यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

छुटाउनुभयो कि ?