स्थानीय निकायको चुनाव तत्काल गर्नुपर्छ : सिंह

२८ फागुन, चितवन । उपप्रधानमन्त्री प्रकाशमान सिंहले अन्तरिम समयका लागि भए पनि स्थानीय निकायको निर्वाचन तत्काल गर्नुपर्ने बताएका छन् ।

गणतन्त्र स्थापनापछिको आठौँ जिल्ला परिषद्बाट आउँदो आवका लागि पारित नीति कार्यक्रम तथा बजेट सार्वजनिकीकरण कार्यक्रमलाई विहीबार भरतपुरमा सम्बोधन गर्दै स्थानीय विकासमन्त्री सिंहले सबै दलले घोषणापत्रमा दोस्रो संविधानसभाको निर्वाचनको छ महिनाभित्र स्थानीय निकायको निर्वाचन गर्ने उल्लेख गरेको स्मरण गराए ।

‘नयाँ सविंधान जारी भएपछि पनि स्थानीय निकायको निर्वाचन गर्न समय लाग्छ, अन्तरिम समयका लागि भए पनि स्थानीय निकायको निर्वाचन यथाशक्य छिटो गर्नुपर्छ,’ उनले भने । स्थानीय निकायको निर्वाचनले संविधान निर्माणमा कुनै असर नपर्ने बताउँदै उनले स्थानीय निकायको निर्वाचनका लागि बाटो खोल्न संशोेधित प्रस्ताव संसदमा पेस भइसकेको बताए ।

बजेट ९३ करोड

कार्यक्रममा स्थानीय विकास अधिकारी भरतमणि पाण्डेले आउँदो आर्थिक वर्षका लागि जिविसका विभिन्न शीर्षकमा ९२ करोड ९९ लाखको बजेट सार्वजनिक गर्नुभयो । गत आवमा ५३ करोड २० लाख रूपैयाँ यथार्थ खर्च भएको थियो भने चालु आर्थिक वर्षको संशोधित बजेट करिब ७१ करोड ५९ लाख रूपैयाँ छ । रासस