रौतहटमा इदको रौनक

२३ असार, रौतहट । मुस्लिम धर्मावलम्बिहरुको ठूलो चाड इद आज हर्षौल्लास पूर्वक मनाइदै छ । देश भरका मुस्लिम समुदायहरुले यस पर्वलाई आफ्नो प्रमुख पर्वको रुपमा मनाउने गर्दछन् ।

एक (रमजान) महिनाको व्रतपछि आज मुस्लीम समुदायका पुरुषहरु एकै ठाँउमा भेला भई नमाज पढे पछि, एक अर्कालाई अंकमाल गरि शुभकामना आदान प्रदान गरि मिठा परिकारहरु खाएर यो चाड मनाइ रहेका छन् ।

मुस्लिम क्यालेन्डर अनुसार रमजान महिना भरिको रोजा -व्रत) पछि को अल्लाहको प्रार्थना पूरा गरि एकअर्का, नातेदार तथा ईष्ट मित्रको घरमा गएर आजको खास परिकार सेवई खादै रौतहटका मुस्लीम समुदाय खुशीका साथ यो पर्व मनाउदै छन । सदरमुकाम गौरमा रहेका इदगाह तथा मस्जीदहरु, राजपुर, भगवानपुर, भेडियाही लगायतका दर्जनौ मस्जीदहरुमा मुस्लीम समुदायले इदको नमाज पूरा गरेका छन् ।

मुस्लिम धर्मका अनुसार अल्लाहको आदेशमा परापूर्वकाल देखी नै १२ वर्ष भन्दा बढीका सबै मुस्लीम पुरुष तथा महिलाहरुले रमजानको महिना भरि सूर्योदय देखी सूर्यास्त नभएसम्म पानि समेत नखाएर व्रत गर्ने गर्छन । आज इदको दिन गरीब, अनाथ तथा असहायहरु पनि कोही भोको नरहुन भनेर त्यस्ता सबैलाई दान दिएर मिठो परिकार खुवाइने प्रचलन यो समुदायमा रहेको छ ।