१५ फागुन, काठमाडौं । संवैधानिक परिषदले अख्तियार दुरुपयोग अनुसन्धान आयोगका रिक्त आयुक्त पदहरुमा भागबण्डाका आधारमा ५ जनाको नाम सिफारिस गरेको छ ।
परिषदको शुक्रबार बसेको बैठकले साबित्री गुरुङ, दीप बस्नेत, नवीनकुमार घिमिरे, गणेशराज जोशी र राजनारायण पाठकलाई आयुक्तका लागि सिफारिस गरेको हो ।
उनीहरुको संसदीय सुनुवाइपछि राष्ट्रपतिबाट नियुक्ति हुने संवैधानिक प्रावधान छ । सिफारिसमा परेकाहरु नियुक्ति भए अख्तियार दुरुपयोग अनुसन्धान आयोग ७ सदस्यीय हुनेछ ।
परिषदको बैठकले प्रमुख पाँच दलबीच भागबण्डाको आधारमा आयुक्तको नाम सिफारिस गरेको हो ।
स्रोतका अनुसार सिफारिस भएका मध्ये पूर्वसचिव नवीन घिमिरे एमालेबाट, भोजपुरकी साबित्री गुरुङ कांग्रेसबाट र गणेशराज जोशी एमाओवादीबाट परेका छन् ।
त्यस्तै दीप बस्नेत राप्रपाको कोटाबाट सिफारिसमा परेका भने राजनारायण पाठक मधेसी दलहरुको साझा कोटामा सिफारिसमा परेका हुन् ।
