१८ फागुन, काठमाडौं । गृहमन्त्री बामदेव गौतमले बानेश्वर झडपमा प्रहरीले दमन गरेको नभई प्रहरीमाथि ज्यादती भएको दाबी गरेका छन् ।
विपक्षी दल एमाओवादीले बानेश्वर झडपमा दमन गरेर गृह प्रशासनले कायरता प्रदर्शन गरेको आरोप लगाइरहेका बेला गृहमन्त्रीले स्पष्टीकरण दिएका हन् ।
संसदको राज्य व्यवस्था समिति बैठकमा सोमबार उपस्थित भएका गृहमन्त्री गौतमले बानेश्वर झडपमा प्रदर्शनकारीले छडले हानेर प्रहरीको हात भाँचेको र ढुंगाले टाउको फुटाएको दाबी गरे । उनले भने-‘प्रहरीको होइन, प्रहरीमाथि ज्यादती भएको छ ।’
जुलुसको स्कटिङका लागि गएको प्रहरीसँग निषेधित क्षेत्र नतोड्ने सहमति भए पनि बानेश्वर आएपछि आन्दोलनकारीले त्यसलाई तोडेको उनको आरोप छ ।
गत शनिबार खुलामञ्चमा भएको ३० दलको आमसभाका लागि तीनकुनेबाट सुरु भएको जुलुस बानेश्वरमा आएपछि प्रहरीसँग झडप भएको थियो । निषेधित क्षेत्र भन्दै प्रहरीले अवरोध गरेपछि भएको झडपमा एमाओवादीका नेता गंगानारायण श्रेष्ठसहितका नेताहरु घाइते भएका थिए ।
कमजोरी लुकाउन खोजेको आरोप
गृहमन्त्री गौतमले राजनीतिक समस्या राजनीतिक रुपबाटै समाधान गर्न सरकार तयार भएपछि विपक्षीले आफ्नो कमजोरी लुकाउन बानेश्वर घटनालाई अघि सारेको बताए ।
सत्तारुढ दलहरु लचिलो भएर संविधानसभा अनिश्चितकालका लागि स्थगित गरेको भन्दै उनले भने-‘सत्तारुढ दलका नेताहरुले सहमतिबाट संविधान बनाउने बारम्बार भनेका छन् । तर, विपक्षीले आफ्नो कमजोरी लुकाउन बानेश्वर घटना अघि सारेका छन् । यसलाई उचाल पछार गर्न जरुरी छैन ।’
चौधरीको आरोप गृहमन्त्रीमाथि
यसअघि समितिको बैठकमा फोरम लोकतान्त्रिकका प्रमुख सचेतक रामजनम चौधरीले सरकार आफैंले बानेश्वर घटना गराउन खोजेको देखिएको बताएका थिए ।
विगत ०६२/६३ को आन्दोलनका बेला पूर्वमन्त्रीहरुलाई ताकेर हानिएको थियो भन्दै चौधरीले अहिलेका गृहमन्त्रीले पनि त्यसबेलाकै रवैया अपनाएको त होइन भनी प्रश्न गरे ।
