२६ फागुन, काठमाडौं । आफ्नै भूमिमा बिकास निर्माण गर्न भारतीय सीमा सुरक्षाबलले रोकेपछि कञ्चनपुरको पुनर्वास नगरपालिकास्थित आनन्दबजारमा भएको विवादले चरम रुप लिँदा एक नेपालीले ज्यान गुमाउनुपर्यो ।
बिहीबार दिउँसोको झडपमा भारतीय प्रहरीले चलाएको गोलीबाट ३० वर्षीय स्थानीय गोविन्द गौतमको मृत्यु भएपछि स्थिति तनावग्रस्त छ ।
स्थिति नियन्त्रणमा लिन थप सुरक्षाकर्मीसहित घटनास्थल पुगेका कञ्चनपुर प्रहरीका एसपी प्रकाश चन्दले भारतीय पक्षसँग छलफल गरी वार्ताको पहल गरेका छन् । उनले भारतीय पक्षलाई उच्चस्तरीय टोली बनाउन र नेपाली पक्षबाट पनि क्षेत्रीय प्रशासकको नेतृत्वमा वार्ताटोली आउने बताएका छन् ।
कञ्चनपुरका प्रमुख जिल्ला अधिकारी र सुदूरपश्चिमाञ्चलका क्षेत्रीय प्रशासक वार्ताका लागि केहिबेरमा आनन्दबजार पुग्दैछन् ।
प्रहरी थपिएपछि नेपाल प्रहरी र सशस्त्र प्रहरी गरी २०० को हाराहारीमा नेपाली सुरक्षाकर्मीले आक्रोशित नेपाली भिडलाई साम्य बनाउने प्रयास गरेको थियो । पहिलो घेरामा प्रहरी र दोस्रो घेरामा सशस्त्र थिए ।
बुधबार साँझ एसएसवीका जवानहरुले नेपालीको घरमा छिरेर कुटपिट गरेपछि त्यसको बिरोधमा सीमा क्षेत्रमा पुगेका नेपाली र भारतीयबीच आज बिहानैदेखि झडप भएको हो ।
दशगजाबाट निक्कै वर, नेपाली भूमिमा कल्भर्ट बनाउन लाग्दा गुगल म्यापले भारतीय भूमि देखाएको भन्दै एसएसवीले रोकेपछि आनन्दबजारमा विवाद सुरु भएको हो ।
यी पनि पढ्नुस्
भारतीय हस्तक्षेपको प्रतिरोध गर्दै दशगजामा ढुंगा हानाहान (भिडियोसहित)