अन्तत नायक आर्यन सिग्देल औपचारिक रुपमै नेपाली सिनेमाको निर्माता बनेका छन् । पत्रकार सम्मेलन गरी उनले निर्माण गर्न लागेको नयाँ चलचित्र ‘नोभेम्बर रेन’को बारेमा जानकारी गराइयो ।भाद्र ३० गतेबाट छायांकनमा जाने यो चलचित्रबाट नेपाली सांगीतिक क्षेत्रका चर्चित गायक धिरज राइकी धर्मपत्नी छुल्थिम गुरुङ पनि रजतपटमा भित्रिदैछिन् । चलचित्रमा नायक आर्यन सिग्देल, नायिका नम्रता श्रेष्ठ, केशव भट्टराई, हिउवाला गौतम, अमितेश शाह, शिशिर राना, अल्पना कर्मचार्य, महेश त्रिपाठी, अर्जुन खड्का र राजु लामाको मुख्य भूमिका रहनेछ ।आर्यन सिग्देल इन्टरटेन्मेन्टको प्रस्तुतीमा सुवास इन्टरटेन्मेन्टले यो सिनेमाको निर्माण गर्न लागेको हो । यसअघि ‘हो यही माया हो’ नामक सिनेमा निर्माण गरेका सुवास गिरीले ‘नोभेम्बर रेन’मा लगानी गर्दैछन् । सुवासले अघिल्लो चलचित्रबाट सिकेर नयाँ स्तरिय सिनेमा निर्माण गर्न लागेको बताए ।
यस्तै कार्यक्रममा बोल्दै निर्माता तथा नायक आर्यन सिग्देलले ‘नोभेम्बर रेन’लाई आफूले बनाएको सिनेमा भनेर गर्व गर्न योग्य बनाउने दाबी गरे । चलचित्रका निर्देशक दिनेश राउतले चलचित्र भनेको वास्तविक जीवन भन्दा परको र नभोगेको बिषयमा बन्ने भन्दै समिक्षकहरुलाई पहिले नै स्पष्टिकरण दिएका थिए ।
कमल गिरी कार्यकारी निर्माता रहेको यो सिनेमामा राजेश श्रेष्ठको छायांकन, सुरेन्द्र पौडेलको सम्पादन, चेतन गुरुङको लेखन, ताराप्रकाश लिम्बुको संगीत, हिमाल केसीको द्वन्द्व, कविराज गहतराजको नृत्य निर्देशन रहने बताइएको छ ।पूर्णतया लभस्टोरी कथामा तयार हुने चलचित्रको जानकारी कार्यक्रममा चलचित्र निर्माता संघका अध्यक्ष राजकुमार राई, चलचित्र पत्रकार संघका अध्यक्ष विदुर गिरी, चलचित्र प्राविधिक संघका अध्यक्ष मनोज केसी लगायतले शुभकामना दिएका थिए ।
चलचित्रको जानकारीसँगै प्रदर्शन मिति पनि घोषणा गरियो । यो चलचित्र प्रेम दिवसको अवसर पारेर देशभरका हलमा प्रदर्शनमा आउनेछ ।