सन्तोष रुचाल
१७ पुस, धनकुटा । धनकुटाको बाख्रेखोला नजिक मंगलबार साँझ बस दुर्घटना हुँदा २२ जना घाइते भएका छन् । भोजपुरबाट धरानतर्फ जाँदै गरेको ना ४ प ५६१३ नम्बरको सावाँ पोखरी यातायातको यात्रुबाहक बस धनकुटा नगरपालिका–३ बाख्रेखोला नजिक पल्टेर दुर्घटना भएको हो ।
घाईतेहरुको जिल्ला अस्पताल धनकुटामा उपचार भईरहेको छ । ओरालोमा ब्रेक फेल भएर दुर्घटना भएको जिल्ला ट्राफिक प्रहरी कार्यालय धनकुटाले जनाएको छ । दुर्घटनापश्चात बस चालक फरार छन् ।
यसैबीच सडकमा बस पल्टेपछि कोशी राजमार्गको धरान–धनकुटा सडकखण्ड अवरुद्ध बनेको छ । राजमार्ग अवरुद्ध बनेपछि दर्जनौ सवारी साधनहरु रोकिएर बसेका छन् । अवरुद्ध राजमार्ग खुलाउने पहल भईरहेको जिल्ला प्रहरी कार्यालय धनकुटाले जनाएको छ ।
