जीडीपीमा पर्यटन क्षेत्रको योगदान शून्यसरह

२८ असार, काठमाडौं । नेपाल प्रशस्त पर्यटकीय सम्भावना बोकेको मुलुक भएपनि अपेक्षीत लाभ लिन सकिएको छैन् । मुलुकको अर्थतन्त्रको मेरुदण्डका रुपमा लिइएको पर्यटन क्षेत्रको कुल ग्राहस्थ उत्पादन (जीडीपी)मा योगदान नगन्य रहेको छ ।

सम्भावना भएर पनि प्रचार प्रसारको अभावमा नेपालले पर्यटन क्षेत्रबाट लाभ लिन नसकेको व्यवसायीहरु बताउँछन् । विगत ११ वर्षको तथ्यांक हेर्दा आर्थिक वर्ष २०६०/०६१ मा पर्यटन क्षेत्रबाट जीडीपीमा ३.४ प्रतिशत योगदान दिएको देखिन्छ । अन्य वर्षहरुमा यस्तो योगदान कम रहेको छ । जीडीपीमा पर्यटनले योगदान बढाउँदै जाला भन्दा पछिल्ला वर्षहरुमा झनै घटाउँदै गइरहेको देखिन्छ ।

सरकारले सार्वजनिक गरेको आर्थिक सर्वेक्षणअनुसार गत आवमा पर्यटन क्षेत्रबाट जीडीपीमा २ प्रतिशत योगदान रहेको थियो । चालु आवको फागुन मसान्तसको अवस्था हेर्दा पर्यटनको जीडीपीमा १.६ प्रतिशत योगदान रहेको उल्लेख गरिएको छ ।

आव २०५९/६० मा पर्यटकबाट ११ अर्ब ७४ करोड रुपैयाँ आम्दानी भएकोमा गत आर्थिक वर्षमा ३४ अर्ब २१ करोड रुपैयाँमात्र आम्दानी भएको थियो । जुन आम्दानी सम्भावनाको हिसावमा हेर्दा निकै न्यून वृद्धि हो । चालु आर्थिक वर्षको फागुन महिनासम्म पर्यटकबाट ३० अर्ब ४३ करोड रुपैयाँ आम्दानी गरेको छ । यहि रफ्तारमा आम्दानी बढ्दै गएमा आर्थिक वर्षको अन्त्यसम्ममा ४५ अर्ब ४६ करोड रुपैयाँ आम्दानी हुने प्रक्षेपण सरकारको छ ।

अर्थिक वर्ष	पर्यटन क्षेत्रबाट अम्दानी (करोडमा)	जीडीपीमा योगदान (प्रतिशत)
२०५९/०६०	११७४.८	२.४
२०६०/०६१	१८१४.७	३.४
२०६१/०६२	१०४६.४	१.८
२०६२/०६३	९५५.६	१.५
२०६३/०६४	१०१२.५	१.४
२०६४/०६५	१८६५.३	२.३
२०६५/०६६	२७९६.०	२.८
२०६६/०६७	२८१३.९	२.४
२०६७/०६८	२४६१.१	१.८
२०६८/०६९	३०७०.४	२.०
२०६९/०७०	३४२१.१	२.०
२०७०/०७१* (फागुनसम्म)	३०४३.०	१.६
२०७०/०७१ (प्रक्षेपण)	४५४६.०	–