१३ असोज, बारा । पूर्वप्रधानमन्त्री तथा नेकपा एमालेका नेता माधवकुमार नेपालले संविधान निर्माणमा एमाओवादी बाधक बनेको आरोप लगाएका छन् ।
दसैंको अवसरमा नेकपा एमाले बाराले औराहामा गरेको शुभकामना आदानप्रदान कार्यक्रममा नेता नेपालले एमाओवादीले संविधान निर्माणका लागि काम भइरहेका बेला विभिन्न अड्को थापेर संविधान नबनाउने खेल सुरु गरेको बताए ।
जनताले तेस्रो स्थानमा पुर्याएको पार्टीले राष्ट्रिय राजनीतिको नेतृत्व गर्छु भन्नु हास्यास्पद रहेको भन्दै नेपालले जनताको म्यान्डेट अनुसार काम गर्नुपर्ने बताए । उनले आफ्नो हैसियत अनुसारको काम गर्न माओवादीलाई आग्रह गरेका छन् ।
दलहरु संविधान निर्माणमा जुट्नुपर्ने बताउँदै नेता नेपालले जसरी पनि माघ ८ मा संविधान जारी गरिछोड्नुपर्ने बताए ।
क्रान्ति शाहबाट
