सातामा ५१ प्रतिशतले घट्यो सेयर कारोबार

२४ माघ, काठमाडौं । यो साता नेपाल स्टक एक्सचेन्ज (नेप्से) परिसूचक ७.२२ अंकले घटेर ९८४.२२ अंकमा ओर्लिएको छ ।

नेप्सेमा साताभरमा ४५ लाख ३४ हजार कित्ता सेयर १ अर्ब ७४ करोड ८९ लाख पाँच हजार रुपैयाँमा किनबेच भएका छन । यो गत साताको भन्दा ५१ प्रतिशतले कम हो ।

‘क’ वर्गका कम्पनीहरुको कारोबार मापन गर्ने सेन्सेटिभ इन्डेक्स पहिलो दिनको तुलनामा २.०१ अंकले घटेर २१०.२३ अंकमा आईपुगेको छ ।

कारोबार रकमका आधारमा यो साता नेपाल इन्भेष्टमेन्ट बैंक अग्र स्थानमा छ । बैंकको २० करोड ५८ लाख ८० हजार रुपैयाँको संस्थापक सेयर किनबेच भएको छ । त्यस्तै, हकप्रद सेयर वितरण गर्ने समाचारका कारण सेञ्चुरी कमर्सियल बैंकको सबैभन्दा वढी पटक सेयर कारोबार भएको छ ।

यो साता नौं वटा कम्पनीका सेयर सुचिकृत भएका छन् । आठ वटा कम्पनीको वोनस सेयर सुचिकृत भएको छ भने एनआइबिएल समृद्धि फन्ड-१ का १० करोड इकाइ सुचिकृत भएको नेपाल स्टक एक्सचेञ्जले जनाएको छ ।