२१ फागुन, इलाम । इलामका तीन सय सात जना विद्यार्थी एसएलसी दिनबाट बञ्चित भएका छन् । ७५ प्रतिशत हाजिर नपुगेको तथा राजश्व नतिरेकाले बञ्चित हुने भएको जिल्ला शिक्षा कार्यालयले जनाएको छ ।
शिक्षा कार्यालयका अनुसार अभिभावक र स्वयम् विद्यार्थीको लापर्बाहीका कारण उनीहरु परीक्षा दिनबाट वञ्चित भएका हुन् । शिक्षा नियमावलीअनुसार ७५ प्रतिशत हाजिर नपुगेका विद्यार्थीलाई परीक्षामा सामेल नगराउने भन्ने विषयले गर्दा धेरै विद्यार्थी परीक्षाबाट वञ्चित हुनुपरेको जिल्ला शिक्षा कार्यालयका परीक्षा फाँटका अम्बिकाप्रसाद खनालले बताए ।
प्रवेशिकामा इलामका ६ हजार ९ सय ८२ विद्यार्थी सामेल हुने भएका छन् । एक्जाम्जेटेडतर्फ तीन हजार १ सय ८९ र नियमिततर्फ तीन हजार ७ सय ९३ जना रहेका छन् । यस्तै खुल्लातर्फ ७५ जना नियमित र १३ जना एक्जाम्टेडले परीक्षा दिने जिशिकाले जानकारी दिएको छ ।
यस वर्ष एसएसली परीक्षाका लागि ३० वटा परीक्षा केन्द्र निर्धारण गरिएको जिशिकाले जनाएको छ । केन्द्र निर्धारण गरिए पनि केन्द्राध्यक्ष भने नियुक्ति भइनसकेको बताइएको छ ।
