पोखराको आकासमा प्याराग्लाइडिङ ठोक्किदा पाइलट र यात्रु घाइते

९ चैत, पोखरा । पोखराको आकासमा सोमबार दुईवटा प्याराग्लाइडडिङ एकआपसमा ठोक्किदा २ जना घाइते भएका छन् ।

सराङकोटबाट उडेको प्याराग्लाइडिङ खपौंदी नजिकै अवतरको क्रममा आपसमा ठोक्किदा एक जना पाईलट र एक जना चिनियाँ महिला पर्यटक घाइते भएका हुन् ।

फ्लाई नेपाल प्याराग्लाइडिङ्ग कम्पनीका प्याग्लाइडिङ इलट चेतनारायण न्यौपाने र उनीसँगै प्याराग्लाइडिङ गरेका एक चिनियाँ महिला पर्यटक २५ बर्षीया झुङ्ग हुइ लिङ घाईते भएको नेपाल हवाई खेलकुद संस्था (ना) का महासचिव वसन्तराज दवाडीले बताए ।

दवाडीका अनुसार पाइलट न्यौपाने र हनुमान प्याराग्लाइडिङ कम्पनीका प्याराग्लाइडर टर्करको ग्लाइडर आपसमा ठोक्किएको थियो । टर्करलाई भने केही भएको छैन ।

न्यौपानेको ग्लाइडर तल खसेर भुईंमा बजारिन पुग्दा घाइते भएको प्रत्यक्षदर्शीले बताएका छन् । जमिनदेखि करीब एक सय मिटरमाथि लड्न पुगेको स्थानिय प्रत्यक्षदर्शीको भनाइ छ ।

गम्भीर घाइते भएका पाइलट न्यौपानेलाई तत्कालै उद्धार गरेर हेलिकोप्टरमा काठमाडौं लगिएको थियो । उनको देब्रे खुट्टा भाँच्चिनुका साथै ढाडमा चोट लागेको छ । उनको ग्राण्डी अस्पतालमा उपचार भइरहेको महासचिव दवाडीले बताए ।

घाइते भएकी चिनियाँ पर्यटक लिङको भने पोखराको फिस्टेल अस्पतालमा उपचार भइरहेको छ । उनको दाहिने हातमा गहिरो चोट लागेको छ ।