२० चैत, सिराहा । सिरहाको दशगजा क्षेत्रमा एक नेपालीको गोली हानी हत्या भएको छ ।
गोली लागि सिराहाको लगटीगोट ३ बस्ने ५५ वर्षका रामशंकर मण्डलको मृत्यु भएको जिल्ला प्रहरी कार्यालय सिरहाका एसपी राम क्रिपालले जानकारी दिए ।
भारतको हरारा जान लागेका चार जनामध्ये मण्डललाई बिहीबार राति ८ बजेको समयमा गोली लागेको थियो । तीन जना साथीहरु केहीसमय अघि हिँडेकाले मण्डल पछाडि रहेको र उनलाई गोली प्रहार भएको प्रहरीले जनाएको छ ।
साथीहरुले घरमा मण्डल घाइते भएको खबर गरेपछि नजिकै रहेको भारतको अस्पतालमा उपचार गर्न लगिएको थियो ।
त्यहाँ उपचार सम्भव नभएपछि फर्काएर घर ल्याउनेक्रममा मण्डलको मृत्यु भएको हो । मण्डललाई घर ल्याएपछि मात्र उनलाई गोली लागेको भन्ने खबर प्रहरीले थाहा पाएको थियो । घटनाको अनुसन्धान भइरहेको प्रहरीले जनाएको छ ।
