मजदुरको मृत्यु पछि हुलास उद्योग बन्द

सुभाषप्रसाद साह

३ जेठ, कलैया । कामदारको मृत्यु भएपछि बाराको सिमरास्थित हुलास स्टिल इण्डष्ट्रिज प्रालि बन्द भएको छ ।

उद्योगको ग्यास प्लान्टमा काम गरिरहेकाबेला सिमरा निवासी २५ वर्षीय शंकर खतिवडाको आइतबार मृत्यु भएको हो । उनको ग्यास लीक भएर मृत्यु भएको बताइएको छ ।

खतिवडाको मृत्यु भएपछि उचित क्षतिपूर्ति र परिवारको सदस्यलाई काम दिनुपर्ने माग गर्दै मजदुरहरुले आन्दोलन शुरु गरेका छन् । मजदुरहरुको आन्दोलनपछि उद्योग बन्द छ ।

उद्योग प्रशासनले माग पूरा नगरेसम्म आन्दोलन जारी रहने समग्र उद्योग ट्रेड युनियनका महासचिव आनन्द थामीले बताए ।