२३ भदौ, काठमाडौं । संविधानसभाको चौथो ठूलो दल राप्रपा नेपाल संविधान निर्माण प्रक्रियाबाट अलग भएको छ । बुधबार बसेको राप्रपा नेपालको केन्द्रीय कार्यसम्पादन समितिको बैठकले संविधान निर्माण प्रक्रियामा सहभागी नहुने निर्णय गरेको हो ।
राप्रपा नेपालका अध्यक्ष कमल थापाले ट्वीट गरेका छन्, ‘राप्रपा नेपाल केन्द्रीय कार्य सम्पादन समितिको बैठकले संविधान निर्माणको बाँकी प्रक्रियाबाट अलग हुने निर्णय गरेको छ ।’
राप्रपा नेपाल केन्द्रीय कार्य सम्पादन समितिको बैठकले संविधान निर्माणको बाँकी प्रक्रियाबाट अलग हुने निर्णय गरेको छ
— Kamal Thapa (@KTnepal) September 9, 2015
राप्रपा नेपालको केन्द्रीय कार्यसम्पादन समितिमा अधिकांश नेता संविधान निर्माणको प्रक्रियाबाट बाहिरिनुपर्ने पक्षमा उभिएका थिए ।तर, पार्टी अध्यक्ष थापाले भने प्रक्रियामा रहिरहनुपर्ने भन्दै निर्णयमा नोट अफ डिसेन्ट लेख्ने बताए ।
अध्यक्षले नै नोट अफ डिसेन्ट लेख्ने भनेपछि नेताहरु छलफलमा जुटिरहेकाबेला कमल थापाले ट्वीट गर्दै संविधानसभाबाट अलग हुने घोषणा गरे ।
को-को बाहिरिए ?
संविधान जारी गर्ने प्रक्रिया अन्तिम चरणमा पुगेकाबेला असन्तुष्ट दलहरुले संविधान सभा छाड्ने क्रम बढेको छ । यसअघि मंगलबार मात्र मधेसी जनअधिकार फोरम लोकतान्त्रिक संविधान निर्माण प्रक्रियाबाट अलग भएको थियो ।
अहिलेसम्म उपेन्द्र यादव नेतृत्वको समाजवादी फोरम, महन्त ठाकुर नेतृत्वको तमलोपा, राजेन्द्र महतो नेतृत्वको सदभावना, महेन्द्र राय यादव नेतृत्वको तमसपा, शरदसिंह भण्डारी नेतृत्वको रामसपा संविधान सभाबाट बाहिरिएका छन् ।
यस्तै थरुहट तराई पार्टी, फोरम गणतान्त्रिक, नेपाल सदभावना पार्टी र संघीय लोकतान्त्रिक राष्ट्रिय मञ्च पनि संविधानसभामा जारी संविधान निर्माण प्रक्रियाबाट अलग भैसकेका छन् ।