२४ भदौ, काठमाडौं । राष्ट्रपति डा. रामवरण यादवले राजेन्द्र क्षेत्रीलाई नेपाली सेनाको प्रधानसेनापतिको दर्ज्यानी चिन्ह लगाइदिएका छन् ।
बिहीबार शीतल निवासमा आयोजित विशेष समारोहमा क्षेत्रीले नेपाली सेनाका परमाधिपति एवं राष्ट्रपतिसमक्ष सपथ लिएका हुन् । सपथ समारोहमा उपराष्ट्रपति, प्रधानमन्त्री, सभामुख, प्रधानन्यायाधीश, सुरक्षा अंगका प्रमुख लगायतको उपस्थिति थियो ।
सपथ लगतै प्रधानसेनापति क्षेत्री जंगी अड्डा पुगे, जहाँ उनलाई रातो कापेर्टले स्वागत गरिएको थियो ।
गौरव शम्शेर राणाले अवकास पाएपछि क्षेत्री नेपाली सेनाको ४२ औं सेनापति बनेका हुन् । २०१७ सालमा जन्मिएका क्षेत्रीले नेपाली सेनामा ३६ वर्ष सेवा गरिसकेका छन् ।
प्रधानसेनापतिको फूली लगाउनु अघि क्षेत्रीले एक महिना कामु सेनापतिको जिम्मेवारी सम्हालेका थिए ।
तस्वीरः विकास श्रेष्ठ/अनलाइनखबर
