एउटै जिल्लाका २० हजार भारतीयसँग नेपाली नागरिकता !

१ मंसिर, काठमाडौं । नेपालसँग सीमा जोडिएको भारतको महाराजगञ्ज जिल्लाका ४० वटा गाउँमा बस्ने २० हजार भारतीयसँग नेपाली नागरिकता रहेको भारतीय सञ्चार माध्यमले दाबी गरेका छन् ।

भारतबाट प्रकाशित हुने नवभारत टाइम्समा मंगलबार प्रकाशित समाचार अनुसार एउटै सुनौली गाविसका एक हजार भारतीयले नेपाली नागरिकता बोकेर हिँडिरहेका छन् ।

उक्त अखबारले लेखेको छ-‘दुवै देशको नागरिकता भएका व्यक्तिहरुको लोकसभा विधानसभा र गाउ पञ्चायतदेखि जिल्लापञ्चायत र क्षेत्र पञ्चायतमा दवदवा बढिरहेको छ ।’

डिसेम्बरमा हुने स्थानीय चुनावमा नेपाली नागरिकतासमेत भएका २० हजार व्यक्तिहरुले चुनाव आयोगलाई समस्या खडा गर्न सक्ने समाचारमा उल्लेख छ ।

महाराजगञ्ज जिल्लाको ८० किलोमिटर सिमा नेपालसित जोडिएको छ । समाचारमा सिद्धार्थनगर, बलरामपुर, बहराइच, गोंडा, श्रावस्ती र लखीमपुरमा पनि थुप्रैले नेपाली नागरिकता लिएको जनाइएको छ ।