१० माघ, काठमाडौं । नेपाल आयल निगमले काठमाडाैंमा अर्को हप्ता निजी चारपांग्रे सवारीलाई पेट्रोल वितरण गर्ने तयारी गरेको छ ।
निगमले अहिले निजी मोटरसाइकललाई पेट्रोल वितरण गरिरहेको छ । भाेलि सोमबार ५१ भन्दा माथिका लटका मोटरसाइकललाई बाँडेपछि मौज्दात बढाएर निजी कार तथा जीपलाई पनि तेल बाँडिने निगम प्रवक्ता मुकन्द घिमिरेले अनलाइनखबरलाई जानकारी दिए ।
‘यसै साता कारलाई पेट्रोल दिन सकिँदैन’ घिमिरेले भने-‘कम्तीमा थानकोट डिपोमा पेट्रोलको मौज्दात १५ लाख लिटर बनाएर मात्रै वितरण गरिनेछ ।’
निगमले दैनिक ३ लाख लिटर पेट्रोल काठमाडौं ल्याउने योजना बनाएको छ । निगमले क्षेत्रीय डिपोहरुलाई कोटा तोकेर काठमाडौंमा आपूर्ति बढाउन निर्देशन दिइसकेको छ ।
आपूर्तिलगत्तै निगमले अर्कोसातादेखि निजी कारलाई लटका आधारमा पेट्रोल वितरण गर्नेछ ।
