कहिलेकाहीँ सहरका धनीमानीहरुले घरमा पालेको महंगो कुकुर हराएपछि कुकुर खोज्नका लागि पत्रिकाहरुमा विज्ञापन नै गरेर फेला पार्नेलाई नगद पुरस्कारको घोषणा नै गर्ने गरेको त हामीले पढेकै छौँ ।
भारतमा भने कुकर मात्र होइन साँढे भेट्टाउनेले पनि पुरस्कार पाउने भएका छन् ।
भारतको वाराणसीका एक किसानले आफ्नो हराएको साँढे भेट्टाएर बुझाउनेलाई ५० हजार भारु पुरस्कार दिने घोषणा गरेका छन् ।
उनले आफ्नो हराएको साँढेको तस्वीर तथा उसका पूरै हुलियाहरुको विवरण सहितको पोष्टर समेत सहरमा टाँसेका छन् । उक्त पोष्टरमै साँढे भेटाउनेलाई पुरस्कार दिइने उल्लेख छ ।
साँढेका मालिक मनोज पाण्डेले आफ्नो बादशाह नाम गरेको साँढे हराएको निवेदन स्थानीय सारनाथ पुलिस चौकीमा दर्ता गराइसकेका छन् । तिन वर्षको उक्त साँढे एक हप्ता पहिले हराएको हो ।
जति खोज्दा पनि साँढे फेला नपरेपछि उनले पुलिस चौकीमा निवेदन दर्ता गरी साँढे फेला पार्नेलाई पुरस्कार दिने घोषणा सहितको सचित्र पोष्टर सहरका भित्ताहरुमा टाँसेका हुन् ।
सारनाथ पुलिस चौकीका प्रहरी प्रमुखका अनुसार मनोज पाण्डेले आफ्नो साँढे हराएको निवेदन चौकीमा दर्ता गरेका छन् र पुलिसले साँढेको खोजी सुरु गरिसकेको छ ।
पुलिसको खोज्मिा भर गर्न नसकेका मनोजले आफ्नो परिवारको सदस्यजस्तै माया गरिराखेको साँढेको खोजीका लागि पुरस्कार सहितको प्रयास अघि बढाएका हुन् ।
यदि कोही चोरले मासुका लागि बेच्न उक्त साँढे चोरेको भए यति धेरै पैसा हात पारेपछि साँढे अवश्य फर्काउँछ भन्ने आशा उनको छ ।
