नायक राजेश हमाल बिहिवारदेखि ५२ वर्षमा लागेका छन् । वि.सं २०२१ साल जेठ २७ मा तानसेन पाल्पामा जन्मेका नायक हमाल चलचित्र ‘युगदेखि युगसम्म’ वाट अभिनयमा प्रवेश गरेका थिए ।
आफ्नै मामा स्व. दीपक रायमाझी निर्देशित चलचित्र ‘युगदेखि युगसम्म’वाट फिचर फिल्ममा प्रवेश गरेका हमालले पहिलो चलचित्रवाटै अत्याधिक चर्चा पाए ।
अभिनयमा प्रवेश गर्नुअघि भारतवाट प्रकासित फेशन नेट म्यागजिनमा उनले फोटो शेसन गरेका थिए भने काठमाडौमा सम्पन्न केहि फेशन शोमा र्याम्प मोडलिङ समेत गरेका थिए ।
१७० बढी चलचित्रमा अभिनय गरेका हमाल पछिल्लो समय अभिनयमा त्यति सक्रिय छैनन् । एक समयका सर्वाधिक चर्चित नायक मानिने हमालका तारिफ पाउने खालका चलचित्र सार्है थोरै छन् ।
वर्षमा १६ वटा सम्म चलचित्रमा काम गरेका हमालले धेरै निर्मातालाई धनी बनाए होलान् । तर, समिक्षकको नजरमा उत्कृष्ट हुन निकै गार्हो पर्यो ।
उनले काम गरेका राम्रा चलचित्रको सूची असाध्यै छोटो छ । राजेश हमालले काम गरेका अधिकांश चलचित्रमा उनी गरिब गाउँले यूवकको भूमिकामा देखिएका छन् । ‘युगदेखि युगसम्म, देउता, वसन्ती, अल्लारे’ लगायतका चलचित्र राजेश स्वयंम आफूलाई पनि मनपर्ने बताउँछन् । उनले अभिनय गरेका चलचित्रको व्यापार कमजोर हुँदा पनि उनको करिअरमा असर परेन । फुर्सदको बेला किताब पढ्न रुचाउने हमाललाईे ‘बिद्धान नायक’ को रुपमा पनि चित्रित गरिएको पाइन्छ ।
काठमाडौमा होस् वा काठमाडौ बाहिर सुटिङमा जाँदा उनको साथमा पुस्तक कहिल्यै छुट्दैन थियो । वर्षको एकपटक घुम्न भन्दै अमेरिका वा बेलायत जाने गरेका हमालले फर्केर आएपछि पनि पुस्तककै कुरा गर्थे ।
एक समय नाउक हमाल र नायिका करिश्मा मानन्धरको ‘रिललाईफ रोमान्सको निकै चर्चा हुन्थ्यो । ‘ढुकढुकी, अल्लारे, यो मायाको सागर, साथी, बसन्ती’ लगायतका चलचित्रमा उनले करिश्माको जोडी बनेर अभिनय गरेका छन् ।
केही महिलाहरुसँग उनको नाम जोडिएपनि उनको प्रेमप्रसंगको चर्चा त्यति भएन । ५० वर्षको उमेरमा उनले मोडल मधु भट्टराईसँग प्रेमविवाह गरेका थिए ।
पछिल्लो समय उनले आफ्नो जन्मदिन बृद्धाश्रम र अनाथ वालवालिकाको विचमा मनाउने गरेका छन् । वालवालिकासँग सम्बन्धित विभिन्न संघसंस्थालाई आर्थिक सहयोग समेत दिने गरेका छन् ।
राजेश हमालको अहिले चलचित्र क्षेत्रमा भूमिका कमजोर बनेको छ । उनले अभिनय गरेको चलचित्र ‘शकुन्तला’ भदौ १० गतेबाट रिलिज हुँदैछ । उनै चलचित्र सम्बन्धी कुनै संघसंस्थामा पनि आवद्ध छैनन् । राजेशको पछिल्लो समयमा चलचित्र क्षेत्रमा सक्रियता निकै कम छ भन्दा हुन्छ ।
हमालले पैसाका लागि चलचित्र खेलेको, कथावस्तु छान्न नसकेको, चलचित्र क्षेत्रमा चलचित्र खेल्नु बाहेक अन्य योगदान केही गर्न नसकेको जस्ता आरोप चलचित्रकर्मी नै लगाउँछन् ।
उनले चलचित्र निर्देशन गर्ने भनेको पनि एकादेशको कथा जस्तै बनेको छ । बिहे गरेपछि हमाल भ्रमण, कार्यक्रम उद्घाटन र महोत्सवमा बढी व्यस्त छन् । नेपाली चलचित्र क्षेत्रका चर्चित नायकलाई हाम्रो तर्फबाट पनि जन्मदिनको शुभकामना ।
