२० असार, काठमाडौं । गाविसबाट नागरिकले पाउनुपर्ने सेवा सुविधा झन्झटिलो र ढिलासुस्ती भएको भन्दै स्थानीय विकास मन्त्रालयमा गुनासो बढेको छ । यस्तै सतर्कता केन्द्रले गरेको अनुगमनले पनि सार्बजनिक निकायबाट प्रदान हुने सेवा प्रभावकारी नभएको देखाएको छ ।
यसैका आधारमा सोमबार स्थानीय विकास मन्त्रालयले गाविस सचिवहरुलाई त्यस्ता प्रवृत्ती सुधार्न निर्देशन दिँदै परिपत्र गरेको छ ।
मन्त्रालयले जारी गरेको परिपत्रमा गाविस सचिवहरुलाई अनिवार्य रुपमा गाउँ विकास समितिको कार्यालयमै बसेर काम गर्न भनिएको छ ।
नागरिक वडापत्र अनिवार्य
यस्तै अनुगमनमा गाउँ विकास समितिले कानुन बमोजिम नागरिक वडापत्र राखेको नभेटिएकाले सबै गाविसमा नागरिक वडापत्र अनिवार्य राख्न पनि निर्देशन दिइएको छ । सतर्कता केन्द्रले सार्वजनिक निकायबाट प्रदान गरिने सेवाप्रवाह प्रभावकारी नभएको भन्दै स्थानीय विकास मन्त्रालयलाई सचेत गराएको थियो ।
यस्तै सतर्कता केन्द्रले गरेको अनुगमनमा भ्रष्टाचार जन्य गतिविधि बढेको पाइएकाले त्यस्ता गतिविधि रोक्ने गरी काम गर्न पनि निर्देशन दिएको छ ।