७ साउन, तनहुँ। बोलपत्र दर्ता गराउन गएका एक व्यक्तिमाथि जिविस परिसरमै हतियार प्रहार भएको छ ।
जिविस पुगेका व्यास नगरपालिका–५ का २७ वर्षीय विष्णुबहादुर रानामाथि आयुष बरालको टोलीले खुकुरी प्रहार गरेको प्रहारीले जनाएको छ । घाइते रानाको अनुहारमा गहिरो चोट लागेकाले दमौली अस्पतालमा उपचार भइरहेको छ ।
घटनामा संलग्न नौ जनालाई पक्राउ गरी आवश्यक अनुसन्धान भइरहेको जिल्ला प्रहरी कार्यालयका प्रहरी नायब उपरीक्षक सुरेन्द्रबहादुर गुरुङले बताए ।
प्रहरीले घटनास्थलबाट खुकुरी र चक्कु समेत बरामद गरेको छ । खुकुरी प्रहार गर्नेले बोलपत्र दर्ताका लागि पेस गर्न लगिएको आवश्यक कागजपत्र समेत लुटेका थिए ।
जिविसले गत असार १० गते सेती, हलेदी, तालबेंसी, साखरबेनी, नारीघाट, मार्कीचोक, मादीसेती, काहुँशिवपुरलगायत २० घाटमा आन्तरिक खरिद बिक्रीका लागि प्रथम पटक ढुङ्गा, गिट्टी र बालुवाका लागि रु तीन करोड ५० लाखको बोलपत्र आह्वान गरेको थियो ।
