एक दशकदेखि फेसन डिजाइनमा सक्रिय विश्व गौतमलाई निर्माता तथा निर्देशक सुदर्शन थापाले आफ्नो नयाँ चलचित्र ‘म यस्तो गीत गाउँछु’मा अनुवन्धित गरेका छन् । लभ स्टोरी चलचित्र निर्माणमा सफल मानिएका निर्देशक थापा यसपटकको प्रोजेक्ट विशेष बनाउने धुनमा कस्सिएका छन् । उनको यो मेकिङ स्टाइल संभवत ‘प्रेमगीत २’सँगको प्रतिस्पर्धा पनि हुनसक्छ ।
नेपाली चलचित्रका नायिकाको रोजाइमा समेत पर्ने गरेका विश्वले थुप्रै अन्तरराष्ट्रिय स्तरका र्याम्प र फेसन शोमा डिजाइन गरिसकेका छन् । उनले पहिलो पटक चलचित्रका लागि फेसन डिजाइन गर्न लागेका हुन् । विश्वले आफूले राम्रो ब्यानर र निर्देशकको प्रतिक्षा गरेको भन्दै बल्ल इच्छा पुरा भएको बताए । सुदर्शनकै आग्रहमा विश्वले चलचित्र ‘प्रेमगीत’को पोष्टर पिक्चरका लागि नायिका पूजा शर्मा र नायक प्रदिप खड्काका लागि डिजाइन गरेका थिए ।
चलचित्र ‘म यस्तो गीत गाउँछु’मा नायक पल शाह र नायिका पूजा शर्माको मुख्य भूमिका रहनेछ । तिहार लगतै छायांकनमा जाने यो चलचित्र पूर्ण रुपमा प्रेमकथामा निर्माण हुनेछ । चलचित्रमा सरोज खनाल, राजाराम पौडेल, नविन मानन्धर लगायतको पनि अभिनय रहनेछ । दिनेश न्यौपानेको कथा रहेको यो चलचित्रको प्रदर्शन मिति अहिले तय भैसकेको छैन । तर, सुदर्शन चलचित्रलाई कलरफूल बनाउने कोशिशमा लागेका छन् ।