६ पुस, काठमाडौं । यू-१९ एसिया कपको पहिलो खेलमा नै टेष्ट नेशनलाई हराएर शानदार सुरुवात गर्ने नजिक पुगेर पनि नेपाल एक रनले चुक्यो । परिणाम नेपाल समूह चरणबाटै बाहिरिएको छ । र, टोली मंगलबार राति बजेर काठमाडौं ओलिएको छ ।
तर, दिपेन्द्र सिंह ऐरीलाई अझै त्यही क्षणले घोचिरहेको छ । हुन त उनी म्यान अफ दि म्याच पनि बने र व्यक्तिगत रुपमा उत्कृष्ट प्रदर्शन नै रहृयो । तर, पनि आफैंले जित नजिक पुर्याएर विजयी बनाउन नसक्दाको पीडाले चिमोटिरहेको छ ।
श्रीलंकाले दिएको २२८ रनको लक्ष्य पठ्याएको नेपाललाई अन्तिम ओभरको चार बलमा २ रन चाहिएको थियो । र, क्रिजमा थिए राम्रो खेलिरहेका ऐरी । नेपाली टोलीका सदस्यदेखि खेल हेरिरहेका (इन्टरनेटमा) नेपाली समर्थनलाई उनीमाथि नै आश थियो ।
नहोस् पनि किन ? उनले नै नेपाललाई जित नजिक पुर्याएका थिए र ठीक अघिल्लो बलमा शानदार छक्का हानेका थिए । तर, तेस्रो बलमा उनी दिपेन्द्र चुके र नेपालले १ रनको नमिठो हार व्यहोर्नु पुग्यो । दिपेन्द्र मैदानमै भावविहल भए ।
प्रशिक्षक, म्यानेजर र टिममेटले सम्झाए । । प्रशिक्षक बिनोद दासले खेलमा यस्तै हुन्छ आज दुर्भाग्य भयो भनेर चिन्ता नलिन भने । तर, उनको मनले अझै मानेको छैन । त्यो क्षण सम्झँदै दिपेन्द्रले अनलाइनखबरसँग भने, जितनजिक पुगिसकेको खेललाई आफू अनुकुल अन्त्य गरी टोलीलाई जिताउन नसकेको ग्लानी मलाई रहिरहृयो ।’
उनले श्रीलंकाविरुद्धको खेललाई यसरी सम्झिएः
पहिलो खेलमै श्रीलंकाबिरुद्ध मैले ९० रनको ठूलो पारी खेलेँ । खासमा मैले राम्रो प्रदर्शन गर्छु भनेर योजना बनाएर गएको थिइनँ । तर खेल राम्रो हुँदै गयो र ठूलो पारी खेल्न सकेँ ।
मेरै योगदानले खेल हाम्रो पक्षमा आइसकेको थियो । तर, टेष्ट मान्यताप्राप्त मुलुकलाई उसकै मैदानमा पराजित गर्ने अवसरबाट हामी चुक्यौं । श्रीलंकाले दिएको २२८ रनको लक्ष्य पछ्याएका हामीलाई अन्तिम ओभरमा आठ रनको आवश्यकता थियो । स्ट्राइकमा मै थिएँ । अर्को एण्डमा नन्दन (यादव) थियो । उ भर्खरै क्रिजमा आएको थियो ।
टेष्ट टोलीबिरुद्धको खेलमा हामी जित नजिक पुग्दा अवस्था पनि म दबावमा थिएँ । तर, आत्मविश्वास भने बलियो थियो कि हामी श्रीलंकालाई हराउन सक्छौं ।
अन्तिम ओभरमा बायाँहाते स्पिनर प्रविन जयाबिक्रमाले बलिङ गरे । पहिलो बल मिड अफतर्फ प्रहार गरेँ । रन लिनसकिने भएपनि हामीलाई बाउण्ड्री आवश्यक भएकाले मैले रन लिइनँ ।
दोस्रो बल गुड लेन्थमा थियो । मैले एक स्टेप अगाडि बढेर स्ट्रोक खेलेँ । बल ब्याटको बीचैमा लाग्यो र स्ट्रेट छक्का भयो ।
त्यसपछि हामीलाई चार बलमा २ रन अवश्यकता थियो । तेस्रो बल पनि उही लेन्थमा थियो तर, मैले रक्षात्मक खेलेर एक/दुई रन लिने विचार गरेँ र स्ट्रोक नखेलेर स्वीप गरेँ । तर, दुर्भाग्य म एलवीडब्ल्यू धरापमा परेँ ।
श्रीलंकाका अधिकांश खेलाडी ३० यार्डभन्दा भित्र रहेको अवस्थामा मैले शट खेलेको भए बाउण्ड्री हुनसक्थ्यो । तर रक्षात्मक खेल्दा आउट हुन पुगेँ । र, नेपाल एक रनले हार्न पुग्यो । खेलमा मैले म्यान अफ द म्याचको अवार्ड त पाएँ तर, टिमलाई जिताउन नसकेकोमा ग्लानी भयो ।
अपेक्षा अनुसारको प्रदर्शन
दिपेन्द्र अनुभव हासिलका लागि यू-१९ एशिया कप नेपाली टोलीका लागि महत्वपूर्ण रहेको बताउँछन् । किनकी टोलीका उनीसँगै दुई सन्दीप (लामिछाने) र (सुनार)सँग मात्रै यू-१९ टोलीको अनुभव थियो । अन्य सबै नयाँ अनुहार थिए ।
तर, नेपालले मलेसियालाई हरायो भने आयोजक श्रीलंकालाई कडा टक्कर थियो । भारतसँग भने सोचेअनुरुप प्रदर्शन भएन । दिपेन्द्र भन्छन्, हामीले अपेक्षा अनुसारको प्रदर्शन गर्यो ।’
उनले अघि भने, हामीमा अनुभवको कमी थियो । सिनियर र अनुभवी टोलीसँग अभ्यास भएको भए हामी सेमिफाइनलमा पुग्न सक्थ्यौं, जुन श्रीलंका जानुभन्दा लक्ष्य थियो ।’
