अब डिभाइसले दिनेछ सुख्खा बन्दरगाहमा कन्टेनर आइपुगेको जानकारीे

९ चैत, वीरगञ्ज  । भारतबाट छुटेको कन्टेनर वीरगञ्जस्थित सुख्खा बन्दरगाहमा आइपुगेको जानकारीे दिन ‘आरएफआईडी डिभाइस’ जडान गरिएको छ । ईसीटीएस जडानको जिम्मा लिएको ट्रान्स सेक्युर प्रालिले रेडियो फ्रिक्वेन्सी आईडेण्टिफिकेशन ‘आरएफआईडी डिभाइस’ जडान गरेको हो ।

ईलेक्ट्रोनिक कन्टेनर ट्रयाकिङ सिस्टम (ईसीटीएस) ह्यान्डलिङको जिम्मा पाएको ट्रान्स सेक्युरले आरएफआईडी रिडर डिभाइस नेपाली पक्षलाई हस्तान्तरण गरिसकेको छ ।

तीन दिनअघि तेस्रो मुलुकबाट विशाखापटनम र कलकत्ता हुँदै रेलमार्गबाट नेपालमा आयात हुने मालसामान बोकेको कन्टेनरमा लगाइने आएरएफआईडी डिभाइस रिडर नेपाली पक्षलाई हस्तान्तरण गरिएको थियो ।

दुई दिनअघि ईसीटीएस डिभाइस जडानको जिम्मा लिएको ट्रान्ससेक्युर प्रालिका नेपाल प्रतिनिधि एवं उमेश शर्मा र भारतीय कस्टमका राहुल कुमारले सुख्खा बन्दरगाह भन्सार कार्यालयका निमित्त प्रमुख भन्सार अधिकृत विष्णु शर्मालाई आरएफआईडी डिभाइस हस्तान्तरण गरेका थिए ।

भारतीय बन्दरगाहबाटै लगाइने आएरएफआईडी डिभाइसले नेपालमा कन्टेनर आइपुगेको यकिन गराउनुको साथै रिडरमार्फत स्क्यान गरेपछि कन्टेनरबारे विस्तृत जानकारी सिपिङ कम्पनीको सिस्टममा पठाउने शर्माले बताए ।

‘आरएफडी डिभाइसमा चिप्स जडान हुन्छ तर यो वान टाइम युज गर्ने हो । सुख्खा बन्दरगाहमा आइसकेपछि यसलाई काटेर फालिन्छ’, उनले भने, ‘यसले पोर्टबाट छुटेको कन्टेनर नेपालको सुख्खा बन्दरगाह पुगेको कन्फर्म गर्छ । सिपिङ कम्पनीलाई जानकारी पठाउँछ । यो नेपालका लागि सुखद शुरुवात हो ।’ यसअघि सिपिङ लाइनले बुलेट अर्थात् बोतल लक लगाएर कन्टेनर पठाउँदै आएका छन् ।

वीरगञ्जपछि छिट्टै विराटनगर र भैरहवा नाकामा पनि रिडर हस्तान्तरण गरिने उनको भनाइ छ ।

तेस्रो मुलुकबाट आयात गरिएको सामानसहितको कन्टेनरमा भारतको कोलकता र विशाखापटनम बन्दरगाहमा ठूलो ईसीटीएस डिभाइस लगाइने गरिएको छ । त्यसलाई सीमावर्ती शहर रक्सोलमा आएपछि खोलेर पुनः फिर्ता पठाइन्छ ।

ईसीटीएसको ठूलो डिभाइस मात्रै जडान हुँदा पहिले रक्सौलसम्म कन्टेनर आइपुगेको थाहा हुन्थ्यो । त्यसले कन्टेनर नेपालको सीमासम्म पुगेको मात्रै यकिन गराउँथ्यो । त्यसपछि कन्टेनर कहाँ ? कुन अवस्थामा छ ? भन्ने जानकारी लिनको लागि आरएफआईडी डिभाइसको प्रयोग गरिएको हो । आरएफडी डिभाइसको मद्दतले अब कन्टेनर सिर्सिया सुख्खा बन्दरगाहमा आइपुगेको जानकारी सजिल सुख्खा बन्दरगाहमा आइपुगेको जानकारी सजिलै पाईन्छ ।

आरएफआईडी डिभाइसबाट कन्टेनरको अवस्थासम्बन्धी सबै जानकारी पाउन सकिने शर्माले बताए ।

इन्टरनेट नहुँदा प्रयोगमा समस्या

आरएफआईडी डिभाइस रिडर नेपाली पक्षलाई हस्तान्तरण गरिए पनि इन्टरनेट नहुँदा प्रयोगमा समस्या देखिएको छ । फाष्ट इन्टरनेटमा डिभाइस रिडरले सजिलै काम गर्छ । तर, वीरगञ्जस्थित सुक्खा बन्दरगाहमा ब्रोडव्याण्ड इन्टरनेट सुविधा छैन ।

ड्राईपोर्ट यार्डमा वाईफाई सुविधा नरहेको र डिभाइसलाई सीमकार्डको माध्यमले मात्रै सञ्चालन गर्दा उपयोगमा जटिलता देखिएको छ । डिभाइस उच्च प्रविधियुक्त भएका कारण यसको प्रयोगका लागि ड्राइपोर्टको यार्डमा तीव्र गतिको वाईफाई सुविधा हुनुपर्ने ट्रान्सक्युरका नेपाल प्रतिनिधि शर्मा बताउँछन् ।

इसीटीएस प्रविधि जडानका लागि नेपाली आयातकर्ता तथा व्यापारीहरुले प्रतिकन्टेनर ३३ सय भारतीय रुपैयाँ तिर्दै आएका छन् ।

सुख्खा बन्दरगाह भन्सार कार्यालयका प्रमुख भन्सार अधिकृत उमेश श्रेष्ठले सुख्खा बन्दरगाह सञ्चालक कम्पनी हिमालयन टर्मिनलले नै इन्टरनेटको व्यवस्था गर्नुपर्ने बताए । ‘भन्सारले क्लियरिङको काम मात्रै गर्ने हो । व्यवस्थापनको जिम्मा हिमालयन टर्मिनलको छ । आवश्यक भए उसले नै इन्टरनेटको व्यवस्था गर्छ’, उनले भने, ‘म अहिले बाहिर छु, वीरगञ्ज गएपछि कसरी अगाडि बढ्न सकिन्छ छलफल गर्छु ।’