५ माघ, सप्तरी । सप्तरीको शम्भुनाथ नगरपालिका–६ स्थित एक पसलमा मङ्गलबार आगलागी हुँदा पाँच लाख रुपैयाँ मूल्य बराबरको क्षति भएको छ ।
स्थानीय विनोदकुमार गुप्ताको किराना पसलमा विद्युत् सर्ट भई अचानक आगलागी भएको प्रहरीले जनाएको छ ।
आगलागीबाट गुप्ताको पसलभित्र रहेका खाद्यान्न सामग्री र नगद गरी अन्दाजी पाँच लाख रुपैयाँ बराबरको क्षति भएको जिल्ला प्रहरी कार्यालयले जनाएको छ । आगोलाई स्थानीयवासी र प्रहरीले नियन्त्रणमा लिएका थिए ।
कम्बल वितरण
यसैबीच, धर्मी हल्फा महिला विकास क्लब, लालापट्टीले सप्तरीको तिलाठी गाविसको ८ र ९ नं वडामा मङ्गलबार कम्बल वितरण गरेको छ ।
केही दिनदेखि तराई मधेसमा बढेको चिसोका कारण प्रभावित क्षेत्रमा धर्मी हल्फा महिला विकास क्लबले यहाँका विपन्न परिवारलाई कम्बल वितरण गरेको हो ।
क्लबका अध्यक्ष समाजसेवी इन्जिनियर सूर्यनारायण यादवले १०० विपन्न, अपाङ्ग, एकल महिला र दलित परिवारलाई एक–एक थान कम्बल वितरण गरेका हुन् ।
यस्तै, सो क्लबले यसअघि जिल्लाको इटहरि विष्णुपुर गाविसको ६, ७, ८ र ९ वडाका रन्जितपुर र गोरगामा रहेका विपन्न, दलित, विधवा र अपाङग गरी १०२ परिवारलाई ब्लाङ्केट समेत वितरण गरेको थियो ।
