२२ फागुन, मोरङ । नेकपा एमालेको मेची-महाकाली अभियानका क्रममा अध्यक्ष केपी ओलीले मोरङको बिराटचोक र इटहरीमा सम्बोधन नगर्ने भएका छन् ।
विभिन्न सभामा फरक-फरक नेताहरुलाई मन्तव्यको जिम्मेवारी दिइएकाले बिराटचोक र इटहरीका जनताले ओलीको भाषण सुन्न नपाउने भएका हुन् ।
शनिबार काँकडभिट्टामा आयोजित अभियान उदघाटन कार्यक्रममा अध्यक्ष केपी ओली र महासचिव ईश्वर पोखरेलले भाषण गरेका थिए ।
बिर्तामोडमा पूर्वप्रधानमन्त्री झलनाथ खनाल र एक नम्बर प्रदेश इञ्चार्ज शेरधन राईले बोलेका थिए ।
त्यस्तै दमक नगरपालिकामा आयोजना गरिएको अर्को जनसभामा केपी ओली र सुभासचन्द्र नेम्वाङले बोलेका थिए ।
झापाको बिर्तामोड र दमकमा जनजातिहरुको बाहुल्य भएका कारण राई र नेम्वाङलाई समेत बोल्न दिइएको एमालेले जनाएको छ ।
मोरङको बिराटचोकमा भाषण गर्ने जिम्मा वामदेव गौतम, भीम रावल र लालबाबु पण्डितले पाएका छन् । पूर्वमन्त्री पण्डित मोरङ जिल्लाबासीसमेत हुन् ।
त्यसैगरी आइतबार साँझ इटहरीमा हुने सभालाई पूर्वप्रधानमन्त्री माधवकुमार नेपाल लगायतका नेताले सम्वोधन गर्ने कार्यक्रम छ ।
आइतबार जनसभा सकेर एमालेका शीर्ष नेताहरु इटहरीमै बास बस्नेछन् । सोमबार बिहान सुनसरीको सदरमुकाम इनरुवामा जनसभा सम्पन्न गरेपछि एमाले नेताहरु सप्तरी पस्ने कार्यक्रम छ ।