२६ चैत, काठमाडौं । नेकपा एमालेले स्थानीय चुनाव कात्तिकमा सार्न प्रस्ताव गरेको माओवादी नेता वर्षमान पुनको भनाइप्रति एमाले सचिव प्रदीप ज्ञवालीले आपत्ति जनाएका छन् ।
एमाले आगामी बैशाख ३१ मै चुनाव हुनुपर्छ भन्ने पक्षमा रहेको बताउँदै ज्ञवालीले अनलाइनखबरसँग भने- ‘एमालेले चुनाव सार्न प्रस्ताव गर्यो भन्ने वर्षमानजीको भनाइ सरासर झूठ कुृरा हो, यस्तो भ्रामक कुरा गरेर आफ्नो राजनीतिक स्तर नघटाउन म उहाँलाई सुझाव दिन्छु ।’
एमालेले चुनाव सार्न नचाहेको तर माओवादीले नै अनेक बाहाना बनाएर सार्न खोजिरहेको ज्ञवालीले बताए । उनले भने- ‘एमाले चुनाब हुनैपर्ने पक्षमा छ, तर सत्तारुढ पार्टीले नै विभिन्न बाहाना बनाएर बैशाख ३१ को चुनाव पछि धकेल्ने षडयन्त्र गरिरहेको छ ।’
माओवादी नेता वर्षमान पुनले शुक्रबार बुटवलमा प्रेस सेन्टरले आयोजना गरेको कार्यक्रममा बोल्दै एमालेले चुनाव कात्तिकमा सार्न प्रस्ताव गरेको बताएका थिए । चुनाव सारिए सरकारमा आउने एमालेले प्रस्ताव राखेको पुनले बताएका थिए ।