४ असार, चितवन । नारायणगढ मुग्लिन सडकखण्डको कालिखोलामा पहिरो जाँदा सडक अवरुद्ध बनेको छ । आज बिहान ३ बजेतिर झरेको पहिरोका कारण यातायात सेवा अवरुद्ध बनेको हो ।
बिहान १० बजेसम्म पहिरो हटाउन सकिने नारायणगढ मुग्लिन सडक निर्माण आयोजनाका प्रमुख चन्द्रनारायण यादवले जानकारी दिए । पहिरो पन्छाउन आयोजनकै डोजरहरूले बिहानैबाट काम गरिरहेका छन् ।
आयोजनाले सडक निर्माणका लागि भन्दै बिहान १० बजेदेखि दिउँसो ४ बजेसम्म दैनिक ६ घण्टा सडक बन्द गराउदै आएको छ । तर आज भने पहिरोका कारण सडक अवरुद्ध भएकोले १० देखि ४ बजेसम्म यातायात बन्द नै गर्ने योजना नभएको यादव बताए ।
कालिखोला पहिरो जोखिम क्षेत्र हो । सुख्खायाममा समेत पहिरो खस्ने यो स्थानमा बर्षातको बेलामा झनै समस्या निम्ताउन सक्ने देखिन्छ ।
नारायणगढ मुग्लिन सडक बिस्तारको काम अहिले भैरहेको छ । पहिरोका कारण सडक अवरुद्ध हुँदा मुग्लिन तर्फबाट नारायणगढ आउन लागेका र नारायणगढ भएर काठमाण्डौं र पोखरालगायतका स्थानमा जाने सवारी साधानहरूको निकै ठूलो लाइन राजमार्गमा देखिएको छ ।
