७ साउन, झापा । बाढी तथा डुबानको प्रकोपबाट हुन सक्ने सम्भावित क्षतिलाई कम गर्न नेपाली सेनाको कालीबहादुर गणले पूर्व अभ्यास सुरु गरेको छ ।
वर्खाको समयमा हुन सक्ने बाढी तथा डुबानको क्षतिबाट सर्वसाधारणलाई जोगाउन सेनाले शिवसताक्षी–१० स्थित कनकाई नदीमा शुक्रबार विपद् व्यवस्थापनसम्बन्धी पूर्व अभ्यास सञ्चालन गरेको हो ।
कालीबहादुर गणका गणपति प्रमुख सेनानी सरोज अधिकारीका अनुसार, गणसँग भएका ओबीएम रबरबोट, ट्युब, डोरी तथा अन्य विपद् व्यवस्थापन सामग्रीहरुको प्रयोग गरी अभ्यास गरिएको छ ।
सेनाको कालीबहादुर गण गत वर्ष पनि कनकाई, विरिङ र मेची नदीले प्रभावित बनेका सयौं घर परिवारको उद्दार, राहत र व्यवस्थामा कार्यमा सक्रिय रुपमा खटिएको थियो ।
